“Koha të hapen negociatat”/ BE mesazh të fortë qeverisë dhe opozitës

13 Shtator 2019, 09:38, Politikë CNA

Ambasadori i BE në Tiranë, Luigi Soreca i ka drejtuar një mesazh të fortë sot si opozitës ashtu edhe mazhorancës, për të kapërcyer krizën politike.

Në një prononcim për mediat, ambasadori Soreca tha se dialogu qeveri-opozitë të nisë me reformën zgjedhore.

“Ju e dini që ne u kemi kërkuar të gjitha partive që të përfshihen në dialog dhe të marrin pjesë në dialog. këtë e kemi bërë nga hera, janë të shumta thirrjet që kemi bërë për dialog. Më lejoni që të them se dialogu duhet të fillojë nga dicka specifike, dhe kjo mund të jetë reforma zgjedhore, që është shumë e rëndësishme dhe e nevojshme, pasi do të sillte një gjë shumë të rëndësishme për shqiptarët. Kjo të bëhet në një mënyrë të drejtë dhe me standardet ndërkombëtare. Çelja e negociata do të ndihmonte edhe përsa i përket dialogut” tha Soreca.

Gjithashtu Soreca tha se është koha që Shqipërisë t?i celen negociatat për anëtarësimin në BE dhe se për këtë duhet të ketë angazhimin e të gjithë aktorëve politik.

Ndërsa,duke komentuar takimin e kryeministrit shqiptar Edi Rama në Berlin, Soreca tha se është i bindur se kancelarja do të japë një motivim shtesë për institucionet shqiptare, që është çelja e negociatave.

“Janë përfaqësuesit e shteteve anëtare të BE-së që do të vendosin. Gjermania është shprehur qartë, por edhe shtete të tjera, se tani ka ardhur koha të çelen negociatat me Shqipërinë. Edhe ne besojmë që ka ardhur koha, dhe duhet të jetë tetori momenti. Ka shtete që po reflektojnë dhe autoritet shqiptare duhet të bëjnë të pamundurën që deri në tetor të kenë gjithcka në rregull për këtë vendim. Kontaktet duhet të vijojnë në pesë javët në vijim dhe këto gjëra po ndodhin. Rama ndodhet në Gjermani për një takim shumë të rëndësishëm me Merkel, dhe jemi të bindur se do të jepet një motivim shtesë për institucionet shqiptare. Çelja e negociatave nuk do të jetë fundi i fillimit, por fillimi i një procesi që do të na çojë përpara, që në tetor të çojë në dhënien e dritës jeshile” tha ndër të tjera ambasadori i BE, Luigi Soreca./ CNA.al