E fundit!

12:09 Aktualitet

Çështja e Zvërnecit/ Rama: Nuk ka projekt të miratuar

Kryeministri Edi Rama ka folur për mediat para samitit BE-...

Skandal tek Krimet e Rënda/ Humbasin fashikujt e dosjes "Tahiri"

17 Korrik 2019, 09:42, Aktualitet CNA

Prokuroria për Krime të Rënda është përfshirë në skandalin e radhës.

Pas skandalit të Shullazit, një tjetër ngjarje e rëndë ka ndodhur në këtë Prokurori, që vetëm e tillë nuk mund të quhet më.

Gjatë seancës gjyqësore të ish Ministrit të Brendshëm Saimir Tahiri, është zbuluar se janë zhdukur fashikuj nga dosja hetimore.

Ka qenë gjyqtari Ardit Mustafaj i cili ka konstatuar skandalin, ndërkohë që prokurorët e çështjes kanë heshtur.

Saimir Tahiri po hetohet nga grupi i prokurorëve, Gentian Osmani, Arenc Çela, Dritan Prenci dhe Vladimir Mara.

Përgjegjësia bie direkt mbi prokurorët, nëse kujtojmë se kemi të bëjmë me një çështje mjaft të ndjeshme dhe me një interes mjaft të lartë në opinionin publik.

Pavarësisht se çfarë përmbajnë shkresat që kanë humbur dhe pavarësisht faktit se mund të rikuperohen lehtë, i rëndë është fakti që janë zhdukur.

Prokurorët i mbajnë shkresat e dosjeve nëpër xhepa, nuk punojnë fare apo i kanë humbur qëllimisht, sigurisht që meritojnë një hetim.

Ky është profesionalizmi i këtyre prokurorëve, njëri prej të cilëve, Gentjan Osmani është edhe anëtar i Këshillit të Lartë të Prokurorisë.

Sipas Saimir Tahirit, janë humbur letrat me të cilat u kërkua arrestimi i tij. Të humbura rezultojnë procesverbalet, ku janë përkthimet në gjuhën shqipe të tre të pandehurve që po përballen me drejtësinë italiane, Moisi Habilaj, Nezar Seiti dhe Meridjan Sulaj. Bëhet fjalë për deklarimet e tyre të dhëna në shtetin italian.

Në fillimin e seancës, kryetari i trupës gjykues Ardit Mustafaj konstatoj se në dosje mungonin pikërisht të përkthyera këto tre dëshmi. Pjesë e dosjes ishin vetëm dëshmitë në gjuhen italiane.

“Ky proces është shtyrë për të tretën herë, herën e parë se letrat e postës ishin të grisura, herën e dytë se nuk ishin bërë njoftimet dhe herën e tretë, që na kanë humbur letrat. Edhe një çerdhe është më e organizuar se kaq. Nuk e di si mund të ndodhë që mund të humbasin letra në prokurori kur dihet kush i ka dërguar dhe kush i ka marrë”, ka thënë Tahiri, pas daljes nga seanca gjyqësore.

Sipas Tahirit, është e shëmtuar si mund të ndodhë kjo në Prokurorinë e Krimeve të Rënda, pasi bëhet fjalë për shkresa që i kanë nxjerrë mediat në gjuhën shqipe, ndërsa prokuroria nuk i ka.

“Ata janë dëshmi në favorin tim, por nuk i dua, heq dorë, vetëm gjyqi të mos shtyhet. Nuk mund të bëj edhe postierin, edhe policin edhe të pandehurin”, ka thënë më tej Tahiri.

CNA.al iu drejtua Prokurorisë së përgjithshme, e cila duke qenë se Krimet e Rënda janë jashtë funksionit, duhet të përgjigjet për këtë skandal.

Të parët që duhet të japin llogari për humbjen e këtyre procesverbaleve dhe për zvarritjen e çështjes janë katër prokurorët Gentian Osmani, Arenc Çela, Dritan Prenci dhe Vladimir Mara.

Por, pa përgjegjësi nuk mbeten as drejtuesja e komanduar e Krimeve të Rënda Donika Prela dhe mikesha e saj në krye të organit të akuzës, Arta Marku./CNA.al