Beteja e klasës politike jo për Shqipërinë por për partinë!

7 Prill 2019, 11:56, Aktualitet CNA

Koment nga Kreu i KSSH Kol Nikollaj:

-Lufta për karrige prej muajsh është kryefjalë e zhvillimeve në Shqipëri, teksa opozita kërkon me ngulm largimin e Ramës dhe zgjedhje pa këtë të fundit, një kërkesë absurde që kësaj opozite nesër kur të jetë në pushtet do ti kthehet në bumerang dhe politika pritet të hyjë në një spirale të rrezikshme.
Aktorët kryesore të kësaj beteje politike jetojnë mes luksit të vënë ndër vite nga benefitet e pushtetit, ndërsa ushtritë e tyre që vijnë nga radhët e popullit të thjeshtë marrin koston më të madhe nga kjo luftë, pasi si do të jetë ekonomia e xhunglës, luanët e tigrat nuk do të hanë asnjëherë bar.
Çdo ditë ku ka seancë parlamentare më mijëra njerëz të kequshqyer e pa para në xhep vijnë për të protestuar, e kur mbaron protesta ata me trena dhe autobuzë kthehen në vendlindjet e tyre, ndërsa drejtuesit e protestës me mjetet e tyre luksoze shkojnë të drekojnë në lokalet e bllokut.
Shqiptarët me mend në kokë e dinë shumë mirë se kjo nuk është luftë për Shqipërinë por për partinë.
Kjo krizë politike i ka dhënë pasojat në administratë ku shërbimi për qytetarët le për të dëshiruar, teksa në fund të fundit edhe vetë punonjësit e administratës nuk e kanë idenë se ku do jenë pas tre ose 4 muajsh. Në takimet që kamë patur së fundmi me sipërmarrës të mëdhenj shqiptarë e të huaj jam përballur me shqetësimet e tyre, pasi ata e dinë mirë se krizat politike në radhë të parë vrasin ekononinë.

Sipërmarrësit e huaj nuk gjejnë asnjë arsye të investojnë në një vend ku nuk ka stabilitet politik, pasi krimi merr pushtet dhe drejtësia lëngon.
Kjo ka bërë që biznesmenët vendas e të huaj të mendojnë mirë përpara se të marrin një iniciative që krijon vende të reja pune, e me keq akoma ka nga ata që po shqyrtojnë mundësinë që bizneset e tyre ti zhvendosin në vende të tjera të rajonit.
Kjo do ishte vrastare për ekonominë tonë të brishtë, e të ngritur mbi gjak e sakrifica.
Duke përfituar nga kriza politike fenomeni si emigrimi të rinjve, skllavërimi në punë dhe kriminaliteti marrin përmasa edhe më të mëdha.
Ndërkombëtarët e kanë shprehur qëndrimin e tyre dhe nëse politikanët tanë vijojnë me lojëra fëmijësh askush nuk do ti marrë më seriozisht në perëndim, ndaj rrezikojmë të anëtarësohemi në Ligën e Republikave kukull vasale të Rusisë.