E fundit!

12:04 Opinione Mentor Kikia

Funerali i “Investitorit Strategjik”, ligji më i zi në historinë e Parlamentit Shqiptar!

Kryeministri i Shqipërisë i premtoi Komisionit Europian se...

Ankesat e opozitës/ Ish deputetët harrojnë dokumentin në tavolinë me shefen e ONM

5 Prill 2019, 15:22, Aktualitet CNA

Genoveva Ruiz Calavera, shefja e Operacionit Ndërkombëtar të Monitorimit (ONM) preferoi të mos i jepte përgjigje pyetjes se çfarë mendonte për shpejtësinë me të cilën po ecën procesi i vettingut.

Në nisje të ditës së dytë të vizitës, ajo u takua me ish deputetët e opozitës, Silva Caka, Klajda Gjosha, Oerd Bylykbashi dhe Aldo Bumçi, ku u përball me një lum ankesash për Reformën në Drejtësi.

Askush nga të ulurit në atë tryezë nuk “dekonspiroi” se çfarë i kërkoi zonjës Calavera, e cila mban, njëkohësisht, edhe postin e drejtores për Ballkanin Perëndimor në Komisionin Europian.

Ish-deputetët e opozitës, pas takimit kanë harruar mbi tavolinë një dokument të mbushur me pakënaqësi, rreth faktit sesi po ecën Reforma në Drejtësi.

Mediat e kanë siguruar këtë dokument, ku duket qartë sesi, që në fillim, ish-deputetët e opozitës i ankohen zonjës Calavera për mënyrën sesi u zgjodh Arta Marku prokurore e Përgjithshme e përkohshme.

Ankesat kanë vijuar me anëtarin e KLP-së, Bujar Sheshi, si bashkëpunëtor i ish-Sigurimit, përfshi çështjen e transferimit të prokurorëve që hetuan ish-ministrin Tahiri.

Po ashtu, ish-deputetët e opozitës kanë folur në këtë takim edhe për Donika Prelën, që sipas tyre është kontestuar gjatë vettingut. Për Donika Prelën, ata kanë thënë se dyshohet se i është hequr viza amerikane, fakt që nuk e ka reflektuar në formularin e vettingut.

Sipas ish-deputetëve të opozitës, kjo ka ardhur pasi Komisioni i Ligjeve ka adaptuar procedura që nuk ekzistojnë askund për të kapur sistemin.

Një tjetër shqetësim drejtuar Calaverës, që ish-deputetët e opozitës kanë ngritur, është gara për kryeinspektor të ILD-së, ku sipas tyre kandidatët Metani, Kokona dhe Gjonçaj kanë lidhje direkt me PS-në.

Nuk ka munguar në këtë takim edhe shpalosja nga ish deputetët e PD-së e biografive të anëtarëve të KLP-së.

Deputetët e opozitës i kanë kërkuar shefes së ONM-së që roli i këtij organizmi, në raport me Reformën në Drejtësi, duhet ridimensionuar, në mënyrë që të respektohet maksimalisht rëndësia që i është dhënë ONM-së dhe rekomandimet e saj mos të zhvlerësohen.

Sipas bashkëbiseduesve të zonjës Calavera, transparenca lidhur me rekomandimet e ONM-së është zero, pasi nuk gjenden të publikuara në faqet e KPK-së, KPA-së apo KP-së./TCH/