Erion Veliaj si Don Kishoti/ I shpall luftë me heshtë medias kritike

13 Shkurt 2019, 19:01, Aktualitet CNA

Nëpërmjet një urdhëri të nëndheshëm kryebashkiaku i Tiranës, Erion Veliaj, i vetëquajtur çuditshëm me nofkën e qëmotëshme “Lali Eri”, ka nxitur shkuljen me gjithë shtyllë dhe ndalimin e reklamës publicitare të CNA.al.

Një akt që, de fakto, do të thotë gjetje rasti për ti shpallur publikisht luftë Agjencisë së pavarur, më të madhe, të lajmeve, që, realisht ,mban qëndrim kritik jo vetëm ndaj Lali Er Veliut, por ndaj gjithçkaje që bie ndesh me moralin dhe ligjin.

Ndaj kryebashkiakut të Tiranës, Erion Veliaj, CNA.al asnjëherë nuk ka qenë tendencioze, në kuptimin që ti qepet, me bukë në trastë, dhe t’ja bëjë të zezë gjithçka. E kemi lëvduar kur e ka merituar, sikurse e kemi kritikuar kur edhe këtë e ka meritur.

Ndaj kryebashkiakut të Tiranës, Erion Veliaj, CNA.al ka ruajtur të njejtin raport, si me gjithë të tjerët, pa i hyrë kurrë në hak, ndaj dhe kur nga burime brenda stafit të tij, u informua se urdhërdhenësi i shkuljes së reklamave dhe ndalimit të dy taksive shëtitëse, ishte vetë dora, Erion Lal Veliaj, bëm çudi.

Nga që edhe në rastin e publikimit të vrasjes së të ndjerit, Ardit Gjoklaj, nuk patëm kurrfare tendence, por pasqyruam veç të vërtetën. Pa e fshehur faktin se gjyqi i bërë ndaj të akuzuarve për vrasjen e tij ishte i manipuluar. Me një dëshmi ekspertësh që kumtonin, pa argumenta, se i ndjeri ishte vrarë jashtë landfillit dhe më pas trupi i tij ishte hedhur aty…

Ngjarjen nuk e ka stisur CNA.al, gjyqin nuk e ka stisur CNA.al, që nuk ka stisur as edhe konkluzionin e ekspertëve. E theksojmë: në këtë mes i vetmi faj që rëndon mbi CNA.al është ai i mos-heshtjes, ndërkohë që media pro Veliajt e bëri këtë akt, aspak gazetaresk.

Por CNA.al bëri edhe fajin tjetër, që nuk ju bind dëshirës së Lali Erit për të shtrëmbëruar e pasqyruar ngjarjen sipas oreksit të këtij të fundit, ndërkohë që jo pak homologe e bën këtë.

Përmendëm rastin e të ndjerit Gjoklaj pasi pikërisht pas këtij publikimi dhe tre ditë pas nisjes së fushatës publicitare, reklama tek stadiumi”Dinamo”, që ka më shumë se dy dekada që funksionon, është shkulur bashkë me shtyllën mbajtëse.

Ndërkohë që shoferët e dy taksive që mbanin mbi karroceri reklamën e CNA.al janë ndaluar të qarkullojnë, duke i vendosur një goxha gjobë të majme.

Gjithçka e sajuar për hakmarrje, për ti mbyllur gojën CNA.al. Një akt jo i panjohur për tipat si Erion Lal Veliaj, që pushtetin nuk e shfrytëzojnë për të përmbushur premtimet elektorale, por për të ushtruar tiraninë.

Me këtë akt kryebashkiaku i Tiranës i shpalli luftë medias kritike, duke harruar se çfarëdo arme të përdorë për të arritur qëllimin ajo nuk është veçse heshtë. E ngjashme me heshtën që personazhi më qesharak i lëtërsisë botërore, Don Kishoti i Mançës, përdorte si armë kundër mullinjve të erës, të cilëve asnjëherë nuk ja doli t’ia ndalte rrotullimin. /CNA.al