E fundit!

21:38 Aktualitet

“Rama jepe dorëheqjen”/ Protestuesit marshojnë në rrugët e kryeqytetit

Pas fjalimeve para Kryeministrisë, protestuesit kanë nisur...

Nga Klodian Tomorri/ Mjegulla që shtrihet përpara

1 Shkurt 2019, 21:47, Aktualitet CNA

Ekonomia italiane u zhyt sërish në recesion teknik. Per herë të parë që nga viti 2013, prodhimi i brendshëm bruto ne Itali është kontraktuar për dy tremujor rresht duke sinjalizuar ndoshta dhe përfundimin e bonusit të jashtëm mbi ekonomine shqiptare.

Statistikisht Italia është vendi me ndikimin më të madh ekonomik në Shqipëri. Ciklet ekonomike të dy vendeve kanë një ngjashmëri thuajse simetrike me një kohë vonesë që varion nga 6 muaj deri në 1 vit. Kur ekonomia italiane përshpejtohet, prodhimi i brendshëm në Shqipëri e ndjek nga pas. Kur Italia hyn në recesion, rritja jone ekonomike ngadalësohet me shpejtësi.

Italia është partneri ynë kryesor ekonomik. Më shumë se gjysma e eksporteve shqiptare shkojnë në Itali, ndërkohë që një pjesë e madhe e dërgesave që ushqejnë konsumin burojnë pikërisht nga Italia.

Kriza italiane vjen në një moment delikat për ekonominë shqiptare. Këtë vit pritet që të maturohen dy investimet më të mëdha të huaja, që kanë mbështetur aktivitetin ekonomik në vend, si Gazjellësi Tap dhe kaskada e Devollit.

Këto dy elemente të vetëm mjaftojnë për të paralajmëruar se viti 2019 do jetë i vështire për ekonominë. Me gjasa rritja ekonomike do të bjerë poshtë nivelit 3.5 për qind, duke goditur të ardhurat e familjeve, ato të buxhetit publik si dhe duke vështirësuar uljen e borxhit.

Përballe këtyre risqeve të pritshmë, viti 2019 ka dhe shumë të panjohura. Së pari, janë zgjedhjet. Zakonisht gjatë fushatave elektorale bizneset pezullojne planet për investime të reja, ndërsa efikasiteti i administrates publike, përfshirë atë fiskale, përkeqesohet ne menyre te ndjeshme.

Por përtej zgjedhjeve, ekonomia mund të marrë një goditje edhe më të fortë besimi nëse Bashkimi Europian do refuzojë hapjen e negociatave me Shqipërinë, çka tashmë duket një ngjarje me probabilitet shumë të lartë. Kjo mund të godasë më tej besimin e investitorëve të huaj në ekonominë shqiptare si dhe mund të vendosë me shumë presion mbi tregun financiar.

Ekonomia ka hyrë në një vit të vështirë. Nga jashtë fryjnë erëra të ftohta ndërkohë që ambienti i brendshëm është i tensionuar. Ky do jetë një vit i vështirë.