Fshehja e ish-sigurimsit në KLP/ Vasili kërkon ndjekje penale për Markun

26 Janar 2019, 18:10, Aktualitet CNA

Kreu i Grupit Parlamentar të LSI-së Petrit Vasili në një postim në rrjetet sociale ka kërkuar shkarkimin dhe ndjekjen penale të Prokurores së Përgjithshme të Përkohëshme Arta Markut.

Sipas Vasilit, shkelja në rastin e Bujar Sheshit është një skandal i thellë dhe i pakapërcyeshëm.

?Arta Marku të shkarkohet dhe të ndiqet penalisht,ndryshe reforma ka vdekur!

Shkelja flagrante dhe e qëllimshme e ligjit nga Arta Marku, në rastin e Bujar Sheshit është një skandal i thellë,kritik dhe i pakapërcyeshëm.

Përgjegjësia e mbulimit të kësaj çështje dhe e shqyerjes së filtrave ligjorë të përcaktuar nga reforma ka vetëm një fajtor Arta Markun Prokuroren e Përgjithshme?,-shkruan Vasili.

Më tej, Vasili shkruan se Marku e ka përcjellë kandidaturën e Shehit pa marrë përgjigje nga Autoriteti për Informimin mbi Dokumentet e ish Sigurimit të Shtetit.

?Arta Marku i është drejtuar Autoritetit për Informimin mbi Dokumentet e ish Sigurimit të Shtetit në 26 tetor 2018.Autoriteti është përgjigjur në 22 janar 2019.

Pra është shumë e qartë, që pa pritur përgjigjen e verifikimit mbi integritetin e figurës Arta Marku ka përcjellë kandidaturën si kandidaturë,që plotëson kriteret, duke Shpërdoruar Detyrën në mënyrë flagrante.

Shkarkimi i Arta Markut është vetëm hapi i parë.

Ligji është i qartë si drita e diellit.

Veprimet antiligjore skandaloze të Arta Markut,prokurorës së kapur nga Edi Rama,s’ka alibi që ti justifikojë?,-vijon më tej Vasili.

Sipas Vasilit shkarkimi i Arta Markut është vija ndarëse për të shpëtuar reformën në drejtësi.

?Shkarkimi i Arta Marku është vija ndarëse: ose për të shpëtuar një reformë në drejtësi të bërë pis që në fillim ose për ta shndërruar përfundimisht drejtësinë në një zgjatim dhe në një mbrojtëse të mazhorancës dhe në funksion të kriminalizimit e korrupsionit ulerites të saj.

Ligji përcakton qartë përgjegjësitë dhe detyrimet të cilat Arta Marku i ka shkelur dhunshëm duke shpërdoruar detyrën?,-shkruan ai.

Në mbyllje të shkrimit të tij Vasili ka ngritur tre pyetje për Arta Markun që sipas të cilit kryeprokurorja e përkohëshme duhet të përgjigjet para drejtësisë.

?Pse Arta Marku shkeli ligjin dhe nuk priti përgjigjen e Autoritetit të Dosjeve të Sigurimit të Shtetit?

Pse Arta Marku përcolli kandidatin pa kryer verifikimin e plotë?

Për llogari të kujt e shkeli ligjin?

A e ka të qartë se Arta Marku me veprimet e saj minonte reformën në drejtësi?

Këtyre pyetjeve dhe shumë të tjerave…Arta Marku do të duhet tu përgjigjet përpara drejtësisë dhe përpara shqiptarëve që prisnin shumë nga reforma në drejtësi,por sot po përjetojnë një zhgënjim të thellë dhe tronditës?,-përfundon Vasili./CNA.al