Dënoi kokën e mafies së Vlorës/ Kush është gjyqtari që KPK e shkarkoi

10 Nëntor 2018, 20:58, Aktualitet CNA

?I paprekshmi? i Vlorës, Edison Harizaj, që u ekzekutua mbrëmjen e së martës në Durrës, kishte arritur të rifitonte lirinë pas një rasti të dokumentuar korrupsioni në Gjykatën e Krujës.

Megjithatë, Gjykata e Vlorës e pati dënuar në vitin 2004 për vrasje me paramendim të kryer në bashkëpunim. Një prej gjyqtarëve që ishte pjesë e treshes që dënoi Harizajn, ishte edhe Shkëlzen Selimi, gjyqtar që është shkarkuar nga detyra nga Komisioni i Pavarur i Kualifikimeve.

Publikohet vendimi i Gjykatës së Shkallës së Parë në Vlorë, për të ndjerin Edison Harizaj. Ky vendim mban datën 3 mars 2004 dhe është firmosur nga gjyqtarët Klodiana Gjyzari, Marsela Balili dhe Shkëlzen Selimi. Bazuar në hetimet e Prokurorisë, trupi gjykues vendosi dënimin e Harizajt me 19 vjet burg, për vrasje me paramendim të kryer në bashkëpunim, plagosje e kryer në bashkëpunim, si dhe tentativë vrasje.

Gjithashtu, kjo treshe vendosi që dënimi të kryhej në një burg të sigurisë së lartë në vend. Megjithatë, edhe pas këtij vendimi, Harizaj qëndroi në qeli rreth 6 vite, duke u liruar nga Gjykata e Krujës në vitin 2010. Edhe pasi rifitoi lirinë, ai ishte hetuar për disa ngjarje të rënda kriminale nga Policia dhe Prokuroria.

GJYQTARI I SHKARKUAR

Në treshen e gjyqtarëve që vendosi dënimin me 19 vjet heqje lirie të Edison Harizajt, ishte edhe gjyqtari Shkëlzen Selimi, i cili u shkarkua me vendim të KPK, pasi iu nënshtrua procesit të vetingut. Por përballë një vendimi të tillë, që është marrë vite më parë nga Selimi, hapet edhe një herë debati për sigurinë e gjyqtarëve e prokurorëve që janë shkarkuar gjatë procesit të vetingut. I tillë është edhe rasti më i fundit, kur viktima, Edison Harizaj, kishte fituar lirinë, në një kohë që gjyqtari që e dënoi atë me 19 vjet burg, ishte shkarkuar nga detyra. Deri para të martës, kur ndodhi vrasja, të dy ishin shtetas të lirë. Harizat, edhe pse me një skedë të pasur kriminale, kishte fituar lirinë, ndërsa gjyqtari Shkëlzen Selimi, tashmë ndodhet i zhveshur nga pelerina e gjyqtarit, pas vendimit të KPK. Viktima Edison Harizaj, të cilit Gjykata e Vlorës i kishte caktuar të kryente dënimin në Burgun e sigurisë së lartë në FushëKrujë, u lirua me një vendim të Gjykatës së Shkallës së Parë të Krujës, në korrik të vitit 2010, për të cilin u provua nga Prokuroria se kishte paguar një shumë të konsiderueshme parash. Harizaj ishte skeduar nga Policia për një serë veprash të rënda kriminale dhe konsiderohej si ?i paprekshmi? i Vlorës. Ndër të tjera, ai njihej edhe si krahu i djathtë i Emiljano Shullazit, por ishte i dyshuar edhe për kryerjen e disa krimeve të rënda, për të cilat ishte hetuar, siç ishte edhe ekzekutimi i gjyqtarit Skerdilajt Konomi./ Panorama