Meta dënon sulmet ndaj gazetarëve/ Apel të fortë, organeve ligjzbatuese

2 Nëntor 2018, 18:46, Aktualitet CNA

Presidenti i Shqipërisë, Ilir Meta, organizoi sot një pritje me gazetarët dhe atashetë e shtypit të ambasadave të huaja, në kuadër të ?Ditës ndërkombëtare, për ti dhënë fund pandëshkueshmërisë së dhunës ndaj gazetarëve?.

Gjatë fjalës së tij, Meta u bëri apel të gjithë gazetarëve, që të vazhdojnë punën e tyre pa u trembur dhe u shantazhuar nga askush.

Më tej presidenti u kërkoi të gjithë organeve ligjzbatuese, që të zbardhin sulmet ndaj gazetarëve, pasi ndikojnë negativisht në lirinë e shprehjes në vendin tonë.

Presidenti u ndal gjithashtu edhe tek vrasja e gazetarit saudit Jamal Khashoggi, duke theksuar rëndësinë që ka nxjerrja përpara drejtësisë e autorëve të kësaj ngjarjeje.

Fjala e plotë e Metës

Dua të shpreh mirënjohjen dhe solidaritetin për të gjithë komunitetin tuaj, për gazetarët dhe gazetaret, për misionin dhe profesionalizmin dhe të drejtën e fjalës së lirë. Liria e medias është një kusht i pazëvendësueshëm për garantimin e të drejtave të njeriut në një shoqëri demokratike. Kur cënohet liria dhe të drejtat e gazetarit është cënuar themeli i sistemit demokratik.

Një solidaritet dua të shpreh për gazetarët e terrenit. Për ata që raportojnë ngjarjet, faktet në mënyrë të menjëhershme. Apeli im sot është që gazetarët të vijojnë pa u trembur në raportimin e lajmit dhe pa u shantazhuar nga askush. Dua të përsëris thirrjen time edhe më parë të bërë publike, ndaj institucioneve, që të zbardhen sulmet ndaj gazetarëve, fatkeqësisht të shpeshtuara, pasi çdo vonesë në këtë drejtim ndikon negativisht në lirinë e shprehjes në vendin tonë. Mosndëshkimi i tyre kundër gazetarëve duhet të marrë fund njëherë e përgjithmonë.

Asnjë gazetari nuk duhet t?i rrezikohet jeta apo t?i rrezikohet vendi i punës për shkak të një lajmi. Dua të inkurajoj promovimin e një mjedisi pune sa më të sigurt për gazetarët që ju ta kryeni misionin tuaj në mënyrë të pavarur dhe larg çdo ndikimi apo ndërhyrjeje të panevojshme. Duhet të respektohet rigorozisht integriteti profesional dhe njerëzor i gazetarëve dhe askush të mos intimidojë dhe për asnjë arsye këtë integritet profesional dhe akoma më rëndë, personal. R

aportimet se në dy vitet e fundit, të paktën 12 gazetarë kanë kërkuar azil në vendet e BE-së dhe në Shtetet e Bashkuara të Amerikës për shkak të rreziqeve të punës, ndërsa 34 të tjerë kanë kërkuar shtetësi në vende të tjera, janë tronditëse dhe alarmuese. Gazetarët duhet të refuzojnë çdo përpjekje që synon të shkatërrojë gazetarinë serioze për ta zëvendësuar atë me ?Fake News?. Humbja e gazetarisë së terrenit është goditje për fjalën e lirë. Njëkohësisht problemet e gazetarëve janë në të gjithë botën prandaj është edhe kjo Ditë.

Me këtë rast dua të dënoj me forcë vrasjen tronditëse të gazetarit Jamal Khashoggi në konsullatën e Arabisë Saudite në Stamboll duke iu bashkuar thirrjes tuaj si përfaqësues të medias, por edhe të gjithë komunitetit ndërkombëtar, edhe unë nënvizoj rëndësinë e bëj thirrje që ky rast të kthehet në një shembull për një hetim gjithëpërfshirës, që do të vërë para përgjegjësisë të gjithë urdhëruesit dhe autorët e tij. Shpresojmë që vitin tjetër të mos kemi raste të tilla dhe liria e medias e të drejtat e gazetarëve të shënojnë përparim. /CNA.al