“Ministri i kufomave”/ Xhafaj bën kurban drejtuesit e Policisë

3 Shtator 2018, 08:55, Aktualitet CNA

Krimi ka mbytur anekënd Shqipërinë. Kufomat kanë mbushur rrugët, oborret e shtëpive. Jeta e qytetarëve është më e pasigurtë se kurrë.

Ndërkohë kemi një Ministër të Brendshëm, që vijon punën i qetë, sikur nuk ka ndodhur asgjë.

Fatmir Xhafaj, njeriu që zëvendësoi Saimir Tahirin në postin e Ministrit të Brendshëm është shndërruar në një mbledhës kufomash, që i numëron për statistikë.

Madje-madje deri diku fajëson se i kanë prishuar imazhin, ata që humbën jetën rrugëve, ata që u vranë nga atentate mafioze, apo nga shpërthime me eksploziv.

Sikur mos të mjaftonte kjo, ministri Xhafaj i fryn zjarrit, duke ndezur kështu skandale njëri pas tjetrit.

Pasi ka injoruar Ligjin Antimafia, me të cilin ai tashmë duhej të ishte shkarkuar, Xhafaj është hedhur në sulm ndaj drejtuesve të Policisë së Shtetit.

Ai ka kërcënuar ata me shkarkim nga detyra, në vend që të largohej vetë nga posti që drejton.

Duke kërkuar që të mbulojë skandalet dhe krimet që po ua marrin jetën qytetarëve, Xhafaj, vë para litarit drejtuesit e policisë.

Mbrëmë në media është raportuar se Fatmir Xhafaj ka paralajmëruar drejtorin e Policisë së Shkodrës, Vehbi Bushati, drejtorin e Policisë së Vlorës Gentian Shehaj dhe Drejtorin e Policisë së Lezhës, Ferdinand Mara se rrezikojnë shkarkimin nga detyra nëse puna e tyre nuk jep rezultate brenda muajit tetor.

Në fakt, nëse nuk do të ndërhyhej në punën e Policisë për të mbylluar skandale, nuk do të ishte kjo situatë kriminale.

Çdo polic dhe çdo drejtues policie, do ta kishte më të lehtë punën e tij, nëse nuk varej nga politika.

Mirëpo, asnjë nga drejtorët e Policisë që kërcënon Xhafaj, nuk mund të fshehë skandalet që rëndojnë mbitë, pavarësisht ultimatumeve që ky i fundit lëshon mbi ta.

Të ishte Xhafaj kaq i interesuar për zbardhjen e krimeve, sot do të kishim një version të qartë për vrasjen e shoferit të tij. Sot do të kishim të vënë në pranga zyrtarët policorë të Vlorës, të cilët kishin dijeni për armatosjen e Ritvan Zykajt dhe nuk morën asnjë masë.

Me pak fjalë so do të kishim një situatë tjetër, dhe jo propagandë dhe ultimatume, për të shpëtuar veten./CNA.al