Abuzoi me fondet/ Ish-drejtori i spitalit në prokurori

25 Korrik 2018, 13:57, Aktualitet CNA

Kontrolli i lartë i shtetit ka ushtruar auditim në Spitalin Rajonal të Shkodrës. Në përfundim u vu re keq menaxhimi i fondeve dhe shpenzime jo në përputhje me parimet e efektivitetit, efiçencës dhe ekonomicitetit.

KLSH i ka përcjellë organit të Prokurorisë Kallëzimin Penal, ndaj z. P. Ç., në cilësinë e ish-drejtorit të Spitalit Rajonal Shkodër (pa përjashtuar këtu edhe përgjegjësinë e personave të tjerë punonjës dhe ish-punonjës të SRSH), me akuzën e ?Shpërdorimit të detyrës? parashikuar nga neni 248 i Kodit Penal.

Ky i fundit ka shkaktuar një dëm ekonomik mbi 20.5 milion lekë dhe me efekt negativ për buxhetin e shtetit në shumën mbi 56 milion lekë.

Postimi i plotë:

Dëmi ekonomik mbi 20.5 milion lekë dhe me efekt negativ për buxhetin e shtetit në shumën mbi 56 milion lekë.

Kontrolli i Lartë i Shtetit, në zbatim të programit të auditimit nr. 40/1 prot., datë 19.01.2018, ka ushtruar auditim në Spitalin Rajonal Shkodër, në përfundim të cilit, me shkresën nr. 40/11 datë 21.06.2018 i ka përcjellë SRSH gjetjet, konkluzionet dhe rekomandimet përfundimtare të Vendimit nr. 53, datë 20.06.2018 të Kryetarit të KLSH. Nga auditimi u konstatua keq menaxhim i fondeve dhe shpenzime jo në përputhje me parimet e efektivitetit, efiçiencës dhe ekonomicitetit, si pasojë e shkeljeve të trajtuara kryesisht si më poshtë vijon:

Pajisjet ekzistuese të hemodializës, rezultojnë se janë lënë të mbyllura tek reparti i vjetër i Hemo-Dializës dhe janë jashtë funksionit, për arsye të braktisjes dhe jo për arsye të mosfunksionimit të tyre. Nga verifikimi u konstatua se ekranet e pajisjeve funksiononin normalisht. Në gjendje pune rezulton edhe impianti i ujit të dializës së vjetër. Përpara ose në kohën që Ministria e Shëndetësisë vendosi të kryejë një investim për një repart Hemo-Dialize në SR Shkodër, drejtori i Spitalit nuk ka ndërmarrë asnjë veprim për të vënë në dijeni MSH për ekzistencën e repartit të hemodializës i cili funksiononte në këtë spital që në vitin 2005. Në fakt, drejtori i SRSH, duhej të informonte MSH, Qendrën Kombëtare të Barnave dhe Pajisjeve Mjekësore, se SRSH, kishte një repart Hemo-Dialize në funksion të plotë e madje me kontrata mirëmbajtjeje që prej investimit fillestar. Drejtoria e SRSH, duhet të kërkonte nga Ministria dhe specialistët e Agjencisë Shqiptare të Pajisjeve Mjekësore, që të inspektonin ambientet e Hemo-Dializës ekzistuese, për të gjykuar nëse pajisjet e Hemo-Dializës ekzistuese do të vazhdonin të funksiononin për SR Shkodër apo do të dhuroheshin në një Spital tjetër p.sh tek Spitali i Kukësit, që nuk e ka pasur komoditetin e këtij shërbimi. Veprimet dhe mosveprimet e drejtuesve të SRSH, janë në kundërshtim me Urdhrin nr. 3272, datë 11.09.2007 të Ministrit të Shëndetësisë ?Mbi politikat kombëtare për menaxhimin e pajisjeve mjekësore në Shqipëri?. Vlera fillestare e investimit të kryer në vitin 2005, për repartin e Hemo-Dializës së SRSH, është 22,308,195 lekë (sipas pasqyrave financiare të vitit 2005) dhe njëkohësisht duke llogaritur amortizimin në vite, vlera e makinerive mjekësore të Hemo-Dializës së vjetër, në momentin e abandonimit të tyre është 11,629,695 lekë, pa llogaritur vlerat e investuara në vite për mirëmbajtjen e makinerive. Lënia në mëshirë të fatit, e 9 makinerive mjekësore të repartit të Hemo-Dializës ekzistuese të SRSH me rëndësi jetike për shëndetin publik, është veprim në kundërshtim me parimet e ekonomicitetit, efiçencës dhe efektivitetit të fondeve publike. Vlera e këtyre makinerive përbën dëm ekonomik të parikuperueshëm.

Sa më sipër, si pasojë e shkeljeve të konstatuara, nga grupi i auditimit janë rekomanduar gjithsej 35 masa organizative, 10 masa për shpërblim dëmi dhe 13 masa disiplinore.

Gjithashtu në zbatim të përcaktimeve të në nenit 281 të Kodit të Procedurës Penale, si dhe nenit 15/gj të ligjit nr. 154/2014 ?Për organizimin dhe funksionimin e Kontrollit të Lartë të Shtetit?, KLSH i ka përcjellë organit të Prokurorisë Kallëzimin Penal nr. 40/13 datë 27.06.2018, ndaj z. P. Ç., në cilësinë e ish-drejtorit të Spitalit Rajonal Shkodër (pa përjashtuar këtu edhe përgjegjësinë e personave të tjerë punonjës dhe ish-punonjës të SRSH), me akuzën e ?Shpërdorimit të detyrës? parashikuar nga neni 248 i Kodit Penal.