“Ndizen motorët” për zgjedhjet lokale/ Çfarë po ndodh në koalicionin opozitar?

5 Korrik 2018, 07:48, Aktualitet CNA

Lëvizja Socialiste për Integrim ka nisur përgatitjet për zgjedhjet lokale, ndërsa PD po shtyn firmosjen e paktit.

Shkak për këtë medohet se është bërë statuti i ri i Partisë Demokratike, i cili ka vështirësuar nënshkrimin e aleancave politike dhe parazgjedhore me partitë e tjera politike, në rastin konkret me Lëvizjes Socialiste për Integrim.

Për rrjedhojë, LSI, e cila ka 8 muaj që pret Lulzim Bashën për firmosjen e paktit politik, ka nisur përgatitjet për zgjedhjet e ardhshme lokale, duke i dhënë një mesazh të qartë Partisë Demokratike, se mund të hyjë edhe vetme në zgjedhje.

Edhe pse PD dhe LSI i bashkon e njëjta kauzë sa i takon çështjes së Teatrit, negociatave dhe luftë politike kundër qeverisë ?Rama 2?, dy partitë kryesore në opozitë, nuk kanë ende një koordinim sa i takon zgjedhjeve të ardhshme.

Sekretari i Përgjithshëm i LSI, Endrit Braimllari, në një prononcim për Shqiptarja.com, ka thënë se ?Për zgjedhjet lokale, ne jemi për ditë në takime me strukturat e LSI në Tiranë dhe në të gjithë Shqipërinë. Jemi çdo ditë në takime jo vetëm me strukturat, por edhe me qytetarët. Strukturat e LSI, të gjithë deputetët dhe krerët e degëve po zbatojnë një axhendë, e cila është miratuar në mbledhjen e fundit të Komitetit Drejtues Kombëtar të LSI. Ende nuk ka një marrëveshje për zgjedhjet lokale. Tani e gjithë fokusi i opozitës, i LSI dhe PD është aksioni opozitar për problemin e teatrit, mos çeljen e negociatave, krimin e organizuar dhe varfërinë. Për këtë ka një rakordim të përbashkët mes PD dhe LSI.

Nga ana tjetër, kryetarja e LSI, Monika Kryemadhi, pas protestës së opozitës në dhjetor të 2017, u shpreh se shumë shpjet do të firmoste një marrëveshje bashkëpunimi me kryetarin e PD, Lulzim Bashën, ku do të përfshihej edhe aleanca parazgjedhore PD-LSI për zgjedhjet lokale të 2019. Edhe në 9 prill të 2018, kryetarja e LSI, Monika Kryemadhi, u shpreh se LSI ishte pranë një marrëveshje me Partinë Demokratike për të hyrë së bashku në zgjedhjet lokale të 2019. Por, vetëm 20 ditë më vonë, Kuvendi Kombëtar i Partisë Demokratike miratoi statusin e ri, i cili vështirëson miratimin e marrëveshjeve parazgjedhore me partitë e tjera.

Kryetarit të Partisë Demokratike Lulzim Basha i duhet që të bindë shumicën e anëtarëve të Këshillit Kombëtar të PD për të miratuar një marrëveshje të mundshme me LSI, për zgjedhjet lokale të 2019.