E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Fajin e kanë kritikët e Lulit

29 Qershor 2018, 11:33, Aktualitet CNA

Kryetari i Partisë Demokratike, Lulzim Basha pas dështimeve të tij të pafundme, sjelljes së çoroditur politike dhe paaftësisë epike për të drejtuar opozitën, tani ka gjetur rrugë të reja për të justifikuar gjithçka që ai bën keq dhe shumë keq.

Kryetari në detyrë i PD-së, i zgjedhur me një proçes të manipuluar një vit më parë, pasi refuzoi të kishte garë dhe u vetëngri, ende sot, jo pas një, por pas katër vitesh në krye të PD-së, nuk ka mundur të zhvillojë një proçes të plotë zgjedhor dhe riorganizimi në PD.

Strukturat janë të shpartalluara. Në shumë degë ka kryetar të komanduar, seksionet janë inekzistente, dhe nga një verifikim në shumicën e degëve, del se PD-ja sot ka një çorganizim të mirëorganizuar.

Për këtë, Lulit fajin ia kanë kritikët dhe kundërshtarët brenda partisë. Pra, për paaftësinë që Basha dhe stafi i tij nuk organizojnë dot PD-në, kush mund ta ketë tjetër përgjegjësinë, vecse atyre që kryetarin që nxjerr urdhëra, nuk e lënë rehat me kritikat e tyre?!

Një vit më parë, Basha firmoste marrëveshje me Ramën. Një marrëveshje që askush ende nuk e di. Qeverisi disa muaj, me atë që vetë Basha e quante kreun e mafias dhe drogës.

Përgatiti një listë të turpshme përfaqësuesish të PD në parlament. Shkoi në zgjedhje dhe humbi në mënyrë skandaloze. Nuk mundi dot të thithte pas tij pakënaqësinë e shqiptareve ndaj qeverisë. Mori rezultatin më të ulët historik të PD-së që nga themelimi i saj dhe për këtë fajin e kanë kritikët e Lulit. Ashtu si Enveri dikur, sozia e tij në miniaturë gjeti sabotatorë e tradhëtarë, megjithëse gjithçka e kishte bërë me dorën e vet, tamam si një atentat dhe akt kriminal ndaj Partisë Demokratike.

Çfarë nuk bëri për të bllokuar Reformën në Drejtësi dhe në fund u dorëzua pa kushte. Nuk ndryshoi dot asgjë dhe pasi e votoi, sot qurravitet për të dhe për këtë prap fajin e kanë kritikët.

Më pak se një vit para zgjedhjeve lokale, në kushtet kur duhet përfunduar Reforma Zgjedhore, Luli nuk flet asnjë fjalë, ndoshta nga kompleksi i tij apo ndoshta nga fakti që ende i del në ëndërr Astrit Patozi, i cili sa herë fliste në parlament i kërkonte palëve të bënin reformën zgjedhore dhe ti jepnin Shqipërisë zgjedhjet që duhen.

Çfarë nuk bëri Lulzim Basha për të shtyrë negociatat e Shqipërisë, për të vonuar hapat në integrimin europian. Ndoshta trembet në gjumë, kur i del Majlinda Bregu dhe i flet me kompetencë dhe autoritet për rrugën e integrimit të Shqipërisë, të cilën Luli nuk e kupton sepse mendjen e ka të mbushur me gomarllëqet e Genc Pollos.

Në makthin dhe frikën e uljes që i bën Jozefina Topalli, ai sheh ëndrra me sabotatorë dhe grupe armiqësor, a thua se fajin për shpartallimin e PD-së, pazaret me Ramën dhe një opozitë të pabesueshme ia ka Ridvan Bode, i cili hesht, por në fakt sheh opozitën skandaloze të Lulzim Bashës, që rrudhet çdo ditë.

Përtej çdo paragjykimi ndaj Lulzim Bashës dhe sikur të duash ta shohësh pozitivisht dhe ti japësh një vlerësim për punën e tij, sheh se Lulit i ka ngelur ora, është keq me ëndrrat dhe makthet e tij. Është i turbulluar dhe nuk gjen rehat dhe për këtë vështirë se gjendet kush që mund ta qetësojë, as ?ilacet? e doktor Berishës nuk i bëjnë derman. Dhe ëndrrat që sheh e trembet natën , zgjohet dhe i sheh të vërteta në mëngjes dhe për gjithcka, për cdo gabim dhe dështim të tij, fajin e kanë kritikët.

Tashmë nuk i ka ngelur gjë tjetër vecse të shkojë të këndohet në ndonjë hoxhë, të largojë “xhindet” e tij, kështu ndoshta do të jetë më i qetë dhe do të gabojë më pak, por sërish fajin që Luli është i paaftë, i padobishëm dhe i pavlerë si politikan gjithmonë do ta kenë kritikët dhe kundërshtarët e tij në PD./ CNA.al