Hetim për kryegjyqtarin/ Ministrja e Ramës kërkon “kokën” e Arben Zefit

13 Qershor 2018, 09:20, Aktualitet CNA

Në vitin 2014, Këshilli i Lartë i Drejtësisë, në një mbledhje me dyer të mbyllura, emëroi në krye të Gjykatës së Shkodrës, gjyqtarin Arben Zefi.

Katër vite më vonë, i njëjti është bërë objekt hetimi nga Ministria e Drejtësisë.

Në fillim të këtij viti, Ministrja e Drejtësisë e drejtuar nga Etilda Gjonaj, ka kërkuar hetim disiplinor për kryetarin e Gjykatës së Shkodrës.

Në media u raportua se në Këshillin e Lartë të Drejtësisë, ka shkuar kërkesa për hetim disiplinor për kryegjyqtarin e Shkodrës, Arben Zefi.

Sipas MD ?së, Zefi ka ndërhyrë për mosnxjerrjen e një vendim penal që konfirmonte se kancelari i Gjykatës së Shkodrës, ishte i dënuar më parë.

“Gjykata e Rrethit Gjyqësor Shkodër, në shkelje të ligjit, nuk ka përcjellë pranë Drejtorisë së Përgjithshme të Burgjeve shkurtimin e vendimit penal të formës së prerë për dënimin e shtetasit A.D, aktualisht kancelar i Gjykatës së Rrethit Gjyqësor Shkodër, për veprën penale të parashikuar nga neni 290/1 i K.Penal. Për pasojë, në Regjistrin e Gjendjes Gjyqësore, ky shtetas rezulton në mënyrë të paligjshme si i padënuar nga gjykatat penale shqiptare”, ka konstatuar Ministria e Drejtësisë.

Ndërsa më herët në vitin 2013, me anë të vendimit Nr. 368, datë 18.09.2013, KLD, ka revokuar vendimin e tij nr.310/3, datë 11.03.2013, “Mbi vlerësimin përfundimtar “shumë mirë” të gjyqtarit Arben Zefi, për periudhën 2005-2006″.

KLD ka ngarkuar Inspektoratin e Këshillit që të bëjë vlerësimin e aftësive profesionale për gjyqtarin Arben Zefi bazuar në të dhënat e reja të grumbulluara dhe ta paraqesë para Këshillit sipas procedurës së përcaktuar në vendimin nr.193/2 datë 11.05.2006 “Sistemi i Vlerësimit të Aftësive Profesionale të Gjyqtarëve”.

Ndërsa sa i përket aspektit, pasuria, sipas formularëve të deklarimti që disponon CNA.al rezulton, se llogaritë e kryegjyqtarit Zefi në lekë dhe në euro janë pakësuar.

Ndërsa si burim të ardhurash ai deklaron pagën e tij dhe të bashkëshortes e cila punon në institucionin e Avokatit të Popullit.

Pasuria e deklaruar nga Arben Zefi

Lekë nga paga, pakësuar me 220,777.08 lekë,

Pakësim i kredisë në euro, pakësuar me 3,920.51 euro

Paga si Kryetar i Gjykatës së Rrethit Gjyqësor Shkodër më vlerën 1 384 361 lek

Të ardhura nga dieta dhe shërbime në vlerën 33 000 lekë

Paga si Avokate Shteti e bashkëshortes në vlerën 858 097 lekë

Kredi në euro prej vitit 2007 deri në vitin 2022. Shlyer në vlerën 3,920.51 euro, ndërsa pa shlyer në vlerën 21,458.15 euro.

Pasuria e deklaruar nga bashkëshortja

Nga paga si avokate shteti, shtuar me 5,862 Lekë

Pakësim i kredisë me 3,920.51 euro./CNA.al