Aldo Bumçi bie në mendime!

29 Maj 2018, 13:35, Aktualitet CNA

Prej kohësh Aldo Bumçin po e lëpin melankolia si lopa viçin. Në televizor shfaqej i ulur si në gji të Krishtit afër Jorida Tabakut, por as kjo përkëdheli e fatit nuk po ja kthente humorin e trembur si zogjtë nga buçimet e çiftes. Vrer e kishte shikimin, të rëndë e kishte fjalën, qefin e kishte heshtjen.

Dertet e vatanit i kanë trazuar midenë, prishur gjumin, bjerrur oreksin, zbehur vizionet e turbulluar oratorinë. I gjendur mes dilemash të mëdha të denja veç për njerëz të përmasave të tij, ai nga lartësia e kulturës, përvojës dhe formimit ideologjik e ka kuptuar tashmë se Edi Rama realisht vetëm atij i druhet.

Të pranosh realitetin nuk është e lehtë. Vit pas viti, Aldo po burrërohet nga brengat e atdheut. Tre herë ministër, e katër herë deputet. Ky është vetëm fillimi. Shqipëria pret shumë prej tij. Me këtë vetëdije shkoi në protestën e datës 26 Maj.

Dukej si Lenini në tetor. Llërëpërveshur, gjoksin hapur…vështrimin e paepur, fjalën si kumt, kumtin si gjyle dhe populli nga pas. Aty e kuptoi përfundimisht se kishte lindur për të qenë prijës.

Mantel i rëndë ky i prijësit. Bashën e ka mik për kokë. Por tani poshtë e përpjetë, Aldo me xhanin e zhuritur nga shpresat e vrara po thotë që duhet një alternativë e re. Është gati të vetëofrohet për të udhëhequr popullin e djathtë në revoltë. Ato metra ne bulevard, ajo ecje plot rëndesë, ajo trimëri e racionalizëm për të dominuar turmën, e bënë të kuptojë se ai ka të gjitha ato që Luli nuk i ka.

Edi Rama e ka kuptuar këtë. Mos ardhtë ajo ditë u thotë të vetëve kur Aldo të udhëheqë opozitën se na përpiu dheu.

Ditë të zeza na presin. Olgerta Manastirliu çjerri faqet kur e mori vesh. Etilda Gjonaj qau me ngashërim. Mirela Kumbaro po mendon për azil politik. Arben Ahmetaj do vishet si grua për të kaluar kufirin. Niko Peleshi me pasaportë greke do shfrytëzoje imunitetin si minoritar. Vetë Rama do strehohet në tunelet e Dajtit. Të gjithë projektojnë vendet e tyre për kur të vijë dita e kiametit.

Ndaj, Aldo është i menduar. Deri tani ka bërë jetë të qetë e bukolike. U ka lënë njerëzve hapësira për dyshim. Ata ndaheshin në gjykim, disa mendojnë që Aldo është budalla, disa gjeni.

Tani të gjithë e kanë kuptuar që është gjeni edhe Avokat Ngjela, të cilin e shtiu në ngasje dhe e bëri të besojë se është idiot. Jo more jo, tani të gjithë e dinë me kë kanë të bëjnë. Aldo Furia është kthyer në piedestalin e veprimit në PD, aty ku i takon si përfaqësues i katolicizmës dhe antikomunizmit. Por rrudhat në ballin e tij që po shtohen duhen interpretuar.

Mos misteret e Ennos dhe egoja e Salianjit si shkopinj nën rrota do i dalin përpara si zbehje vegimesh? Mos e dhëntë Zoti. Aldo është rikthyer si prijës. Ditë të mira po vijnë për PD. Shpresa në Zotin dhe në Aldon është e njëjtë./SATIRË