Një ditë e suksesshme për Salianjin

31 Maj 2018, 19:12, Aktualitet CNA

Salianji pasi e ndau mendjen që do të shquhej tani e tutje edhe si ideolog, në sfidë të hapur me planin e shpëtimit kombëtar që po shkruan Enno, u rrua u qeth, hëngri një vezë të zier, piu një gotë qumësht dhe doli në rruge duke fërshëllyer. Mori ca komplimente rrugës për kostumin e ri blu me vija kafe si pëlhurë dysheku dhe u gëzua pa masë. Nuk hezitoi të takohej me qytetarët siç bëjnë profetët me turmat. Fotot që dolën dje me Gridën ja kishin ngritur lart moralin. Fjala e urtë popullore “qentë le të lehin karvani ecën përpara”, si lumturia e tij pranë zonjës. Sa herë shikimi i tij bie mbi syrin e saj një si ëmbëltim e përfshin dhe bëhet më i urtë e thotë gjëra të mençura pa poezi. Po kaq u kujdes të shfaqej luftarak dhe pranë Kryetarit si i besuar i tij, për më tepër që tani është edhe hero.

Pasi dërrmoi socialistët, krimin e organizuar dhe e bëri Edi Ramën të ikë nga sytë këmbët shkoi të hante drekë me ata që ja krypin xhanin me sevda e miklim. Në tavolinë ha shumë dhe flet pak, se ushqimet janë të thjeshta e mendimet të koklavitura. I shoshit dhe i peshon pastaj i lëshon. Pasi fjeti pak foli me Henri Çilin që t’i rregullonte një intervistë në ABC News. Pas 5 min Henri e mori dhe i tha, ta rregullova shpirt.

Përgjigjja që e menjëhershme “ç’donte isha unë pa ty..gjysmak. Ti më plotëson një gjysmë G.D tjetrën. Më mbushni me lumturi. Çili e mësoi si të sillej e çfarë të thoshte. Në orën 20:00 u shfaq në studio. Milori pati një si siklet nga qëndrimet e tij të hepuara dhe buzëqeshjet e brishta si e bardhë veze.

Por Salianji foli si ideolog dhe njeri i aksionit. Merrte frymë thellë, peshonte fjalët pastaj i hidhte si dhuratë plot gëzim për miletin.

Në strukturë po ndjek Gridën. Fjalitë duken të pakuptimta në sipërfaqe por janë të koduara dhe plot mesazhe politike. Milori merrte frymë thellë dhe kushedi ç’mendonte. Ndoshta i dukej si më e rëndësishmja e intervistave të jetës. Ndërkohe Enno e ndiqte nga zyra. Asnjë nerv nuk i lëvizte. Qetësi dhe heshtje. Mos ndonjë duel do të konsumohet në shkallët e selisë së PD për çështje idesh? Një Zot e di.

Në korridore ka tension dhe frikë. Titanët nuk ndeshen duke shitur njëri-tjetrin.

Ata shkaktojnë apokalips. /SATIRË