Debate të ashpra në PD Shkodër kundra Voltana Ademit/ Ja kush e doli në krah

4 Prill 2018, 19:45, Aktualitet CNA

Mbledhja e kryesisë së PD Shkodër për mosbindje civile është shoqëruar me debate të ashpra. Disa prej të pranishmëve në mbledhjen e zgjeruar kanë shigjetuar kryetaren e bashkisë Shkodër Voltana Ademi. Kryesisë së PD i është kërkuar nga kryetari Çobaj që të organizohen dhe të bëjnë njoftimet për protestën që pritet të zhvillohet. Pasi kreu i PD Çobaj ka mbaruar arsyetimin e tij ata që kanë debatuar ashpër janë ish-kryetarin i komunës Velipojë Nikollë Marku dhe një prej përfaqësuesve të Shalës Martin Marku. Të dy këta kanë qenë thuajsë në të njëjtën linjë. Ata janë shprehur në kryesi se nuk kanë pse të dalin në protestë ose edhe të organizojnë njerëz kur kryetarja e bashkisë Voltana Ademi nuk i pret në zyrën e saj. Ata kanë thënë se kryebashkiakja nuk i hap as telefonin dhe se nuk pranon asnjë lloj komunikimi.

Ai që i ka dalë në mbrojtje kryebashkiakes e cila nuk ishte e pranishme në mbledhje është nënkryetari i bashkisë, njëkohësh kryetar grupseksioni Dritan Meta. Ky i fundit i është kundërpërgjigjur duke thënë se kryebashkiakja ka qenë e gatshme dhe se ka pritur këdo dhe ka komunikuar për çdo problem. Kjo është hedhur poshtë dhe mes tyre ka patur edhe tone të ashpra dhe zë të ngritur.

Anetari i këshillit bashkiak Mark Rupa po ashtu ka patur kritika qoftë për kryebashkiaken por edhe për partinë e tij lidhur me organizimin e 27 vjetorit të 2 prillit. Rupa ka thënë se është një organizim i dobët ai që u bë dhe tani si mund ti kërkohet njerëzve që të protestojnë. Kreu i PD Ramiz Çobaj shprehu edhe ai kritikat ndaj kryetares së bashkisë Voltana Ademi duke thënë se kjo e fundit nuk komunikon dhe se kryebashkiakja në ceremoninë e 2 prillit nuk ka respektuar protokollin siç është vendosur duke dashur të tregojë kokëfortësinë dhe neglizhencën e saj ndaj partisë.

Deputetja Izmira Ulqinaku është munduar të shuaj debatin duke thënë se do marrin pjesë shumë demokrat shkodran në protest dhe se PD-ja e Shkodrës do marrë lavdrime të mëdha. Kishte kohë që nuk zhvillohej një mbledhje kryesie e tillë e gjërë dhe me pjesëmarrjen e thuajse të gjithëve, një mbledhje kjo që tregon edhe njëherë se PD-ja e Shkodrës nuk është aspak e bashkuar por përkundrazi vazhdon që të jetë e përçarë dhe me shumë probleme./ShkodraNews