FAKTET/ Ushtarët e Bashës kundër Berishës

27 Shkurt 2018, 19:54, Aktualitet CNA

Kryetari i Partisë Demokratike, Lulzim Basha, vazhdon të funksionojë, jo si një lider politik i opozitës, por si një zgjatim i kryeministrit Rama dhe në një betejë intrigash dhe thikash pas shpine, ndaj ish-kryeministrit Sali Berisha, liderit historik të PD. Më poshtë po rendisim disa fakte të muajve të fundit, ku ushtarët e Lulit, deputetët e zgjedhur prej tij, janë kontradiktorë në qëndrimet zyrtare politike, por shpesh dhe kundërshtues të ashpër të Sali Berishës.

Saliu kundër Lulit, duket e pabesueshme, Lulushët kundër Berishës janë të vërtetuar, faktuar dhe betuar.

Le të fillojmë nga ngjarja e fundit. Sali Berisha denoncoi një negociator në marrëveshjen me Greqinë, i quajtur Artur Meçollari. Sot në gazetën “Panorama”, një nga deputetët e akuzuar si i emëruar në post duke paguar qindra mijë euro, e kundërshtoi Sali Berishën. Më pas doli në një televizion të Edi Ramës, duke tentuar të justifikonte çdo broçkull që kishte thënë në një gazetë që shpesh e përdor Lulzim Basha. Ish-ministri i Mbrojtjes Arben Imami, ka dalë në një qëndrim duke theksuar se Basha është në dijeni, por sërish ai hesht.

Dy javë më parë CNA.al raportoi një skandal pervers brenda grupit parlamentar të PD-së, Lulzim Basha hesht, nuk tha asnjë llaf për perversitetin e Ervin Salianjit, gjuhën e tij vulgare dhe sjelljen në një seancë parlamentare, nga më të rëndësishme të kauzave politike të opozitës, që kaloi në heshtje.

Ushtari i Lulit, Ervin, është keqpërdorur nga Basha në shumë raste. Kujtojmë debatet në grupin parlamentar të PD disa muaj më parë, kur Berisha tha se, Salianji dhe Duma nuk përfaqësonin zërin e tij dhe të Partisë Demokratike. Që atëherë nuk u panë më në qëndrime publike.

Një nga skandalet që Basha e kaloi në heshtje duke përdorur Ervin Salianjin dhe Grida Dumën është zgjedhja e Gramoz Ruçit si Kryetar i Kuvendit, ku Ruçi mori 90 vota. Salianji dhe Duma pretenduan manipulim të votave për opinionin publik, Berisha kërkoi tradhtarët.

Duke u afruar pak në kohë sërish, në lidhje me marrëveshjen e qeverisë shqiptare me Greqinë për ujërat territoriale, i vetmi që ka folur është Tritan Shehu, i cili kërkon zgjidhje në Gjykatën e Hagës. Berisha qëndron tek marrëveshja e 2009-ës e firmosur prej tij dhe Lulzim Bashës, dhe e quan tradhti të Edi Ramës. Në një nga mbledhjet e fundit të grupit parlamentar të PD-së, ka pasur një përplasje të fortë ndaj qëndrimit të mbajtur nga Tritan Shehu, i cili në fakt çdo artikulim personal, ka dashur ta interpretojë si qëndrim zyrtar të PD-së. Lulzim Basha ende sot nuk ka folur për këtë çështje.

Sekretarja e Marrëdhënieve me Publikun në PD, Grida Duma, nuk ka ngurruar ta quajtur Sali Berishën një koleg, megjithëse ka qenë disa muaj një zv.ministre e ulët e tij. Shpesh me qëndrimet e saj ka qenë e ashpër kundër Berishës. Një fakt i ndodhur është kundërshtimi dhe përplasjet që Berisha ka pasur në grupin parlamentar, por edhe artikulimet publike të Ervin Salianjit dhe Grida Dumës. Pas mungesës së komenteve të Gridës ndaj kolegut Sali Berisha, kemi mosdakordësi mes Ervin Salianjit dhe atij.

E ndërkohë që Berisha ka vlerësuar bashkëpunëtorët e tij, ish-ministrat dhe shumë prej njerëzve që luftojnë në shumë vite, në gati 3 dekada politike, raketat e Lulit e kanë sulmuar, në grup parlamentar, në Parlament, në mbledhje grupi etj.

Të gjitha këto që përmendëm janë të një harku kohor, që fillon nga shtatori i zgjedhjes së Gramoz Ruçit si kryetar Kuvendi, deri sot në deklaratën e një ushtari të Lulzim Bashës që kundërshton qëndrimet e Sali Berishës në lidhje me një spiun, pjesë e grupit negociator me Greqinë.

Këta janë shumë pak, në argumentet që ne do të sjellim ditë pas dite të një neverie politike që vjen nga loja e pistë e Lulzim Bashës, si një “Benjamin” i Sali Berishës, që ndryshe flet, ndryshe vepron dhe ndryshe është në aksion. Nuk e ngatërrojmë aksionin me veprimin, lojën në rrogoz me atë që duket, ata që dalin dhe sulmojnë, me ata që keqpërdoren si sharlatanë në politikë. Këtë se bëjmë për të mbrojtur Berishën, sepse jemi të bindur se nuk ka nevojë për mbrojtjen tonë, të vërtetat janë në fakte më lartë. Të tjera do të sjellim në ditët në vijim. Për Lulin që hesht kur duhet të flasë, për deputetët e tij që sulmojnë Berishën, për pseudo-përfaqësuesit e PD-së që përdoren si marioneta dhe në përfundim tregojnë qartë, se janë vegla të një interesi politik të firmosur nga Lulzim Basha me Edi Ramën më 18 maj.

Marrëveshja Basha-Rama vazhdon me detin, zgjedhjen e Gramoz Ruçit, me spiunët në grupin negociator, me mungesën e opozitës për çështje thelbësore dhe sharlatanizmin e turpshëm të miliarderit Lulzim Basha, i cili njëlloj si Edi Rama dhe Enver Hoxha, ulet gju më gju me popullin. Gjithçka është një show, 18 maji vazhdon. Ushtarët e Bashës sulmojnë Berishën, nuk bëjnë opozitë dhe kanë qëndrime fasadë.

Ata që mendojnë se i kanë dalë Bashës nga rreshti, e kanë gabim, veglat e Luli po i shërbejnë marrëveshjes. Fatkeqësisht opozita sot ka tezat e një grupi që sistematikisht sulmon qëndrimet e liderit historik të Partisë Demokratike. Të keqpërdorur në marrëveshje ose jo, faktet janë fakte. Ushtarët e Lulit sulmojnë Berishën, dhe në rast se kjo është lojë viktimën duhet të presim edhe pak kohë që ta njohim. Ustai ka një hile më shumë se çiraku. /CNA.al