Aferat me vendimet dhe pronat e dyshimta/ Zbardhen emrat e gjyqtarëve dhe prokurorëve që do merren në pyetje

4 Shkurt 2018, 09:12, Aktualitet CNA

Komisioni i Pavarur i Kualifikimit brenda dy javësh pritet që të nxjerrë të dhënat e para sa i takon procesit të vetingut për gjyqtarët dhe prokurorët. Janari ishte muaji kur priteshin rezultate, mirëpo gjatë rrugës janë hasur pengesa.

Gazeta ju drejtua me një kërkesë komisionit për të marrë informacione mbi fazën në të cilën ndodhet puna. Sipas KPK, momentalisht po bëhet hetimi administrativ i vendimeve të gjyqtarëve dhe të prokurorëve dhe komisionerët janë duke punuar me ritëm mjaft të lartë, nga mëngjesi deri në mbrëmje, në mënyrë që të jepen rezultatet e para brenda këtij muaji.

Por gazeta nga burime brenda komisionit ka mësuar se plani është që rezultatet e para të dalin rreth mesit të muajit shkurt, kryesisht për krerët e sistemit të drejtësisë. Por një detaj tjetër interesant është se shumë shpejt 57 gjyqtarë dhe prokurorë do të duhet të japin sqarime para komisionerëve për aferat që kanë bërë, pasuritë korruptive apo lidhjet e mundshme me kriminelë.

Sipas përcaktimeve dhe në ligj, përpara se të jepet vendimi çdo gjyqtar apo prokuror do të paraqitet në një seancë, të ngjashme me ato gjyqësore dhe do të ballafaqohet me faktet që ka mbledhur Komision i Pavarur i Kualifikimit.

Sipas burimeve të gazetës, brenda pak ditësh do të thirren emrat e parë, të cilët do të duhet të japin sqarime për çdo abuzim me vendimet, për pronat e paligjshme, apo dhe nëse rezulton se kanë pasur kontakte me kontigjentë të botës së krimit. Momentalisht në verifikim janë 57 gjyqtarë e prokurorë dhe për të gjithë do të ketë nga një fletëthirrje. Procesi do të monitorohet dhe nga Operacioni Ndërkombëtar i Monitorimit.

Emrat që po verifikohen

Sipas listës së publikuar nga Komisioni i Kualifikimit, vetingu ka nisur me anëtarët e Gjykatës së Lartë, anëtarët e Gjykatës Kushtetuese, Kryeprokurorin dhe ish-kryeprokurorin, kandidatët për në Këshillin e Lartë Gjyqësor, Këshillin e Lartë të Prokurorisë dhe Këshillin e Emërimeve në Drejtësi.

Në këtë mënyrë emra si Adriatik Llalla, Xhezair Zaganjori, apo Bashkim Dedja, do të paraqiten dhe do të pyeten me detaje për të gjitha pronat që kanë deklaruar, çështjet që kanë shqyrtuar apo kontakte me njerëz të ndryshëm të botës së krimit. Më pas komisioni do të dalë me një raport ku vendosë nëse ata e kalojnë apo jo vetingun. Pritshmëritë e shqiptarëve janë të shumta, pasi pranë komisionit ka pasur një valë të madhe njerë- zish që kanë denoncuar gjyqtarë e prokuror, të cilët dyshohet se kanë abuzuar me çështje të caktuara.

Të gjitha dosjet janë administruar dhe atje ku ka dyshime se janë bërë afera, do thellohen hetimet. Mësohet se në lëvizje janë vënë dhe ndërkombëtarët. Ata kanë nisur procesin e hetimeve dhe jashtë vendit dhe shumë shpejt pritet që të dorëzojnë prova për emra të caktuar.

Në ligjin e vetingut dhe në dy rregullore që ka miratuar Komisioni i Kualifikimit, janë përcaktuar procedurat se si procedohet me dosjet e gjyqtarëve. Tashmë ILDKP, DSIK, KLD dhe prokuroria kanë dorëzuar dosjet për pasurinë, pastërtinë e figurës dhe të karrierës për secilin emër. Ndërkohë këta emra janë ndarë me short në 4 trupa gjyqësore që do japin vendimin për çdo emër./Sot