Pazari Rama-Basha dhe Reforma Zgjedhore

23 Janar 2018, 10:55, Aktualitet CNA

Reforma Zgjedhore duket të jetë një nga veprimet e harruara qëllimisht nga palët politike. Një veprim që gjithnjë e më shumë tregon se Lulzim Basha është një papërgjegjshmëri totale politike, ndërsa Edi Rama duke luajtur me ndonjë show për gjoja votim të emigrantëve kërkon që me djallëzi dhe ligësi të ruajë sistemin aktual. Por Reforma Zgjedhore gjithmonë lihet për në momentin e fundit, përdoret djallëzisht nga palët dhe në fund përdoret nga humbësi si argument për akuza, dhe nga fituesi si instrument për të shtuar votat në thes dhe për të thithur maksimumin.

Në fakt sistemi aktual i vitit 2008, pas marrëveshjes Berisha-Rama, është një proporcional rajonial që e ka deformuar jo pak parlamentin por dhe e ka kriminalizuar atë.

I pari që ngriti alarmin e këtij sistemi të korruptuar dhe që dha një produkt kriminal ishte Sokol Olldashi me fjalimin e mbajtur me 7 nëntor 2013, pas zgjedhjeve në Korçë, ku kamerat e FIKS FARE treguan sesi socialistët paguanin studentët.

Olldashi në atë kohë foli edhe për raste konkrete dhe sesi ishte perfeksionuar korrupsioni politik deri në tregun kërkesë-ofertë nga partitë politike për blerje votash me shumicë dhe pakicë.

?Por nëse duam vërtete të merremi me këtë çështje dhe tu japim një përgjigje shqiptarëve duhet ta ndajmë mendjen se në këtë parlament disa do të vazhdojnë të jenë deputetë, ndërsa të tjerë duhet të lënë karriget. Nuk mundet që në këtë sallë të parlamentit të bashkëjetojnë të patrazuar deputetët dhe blerësit. Kjo sallë ka vend për një kategori, ose për deputetët ose për blerësit, të dyja palët nuk mund të rrinë dot?- ky ishte alarmi që dha Olldashi në atë kohë në mbylljen e një fjalimi të tij të fortë.

Pas tij, Astrit Patozi në çdo fjalim që mbante në seancë plenare fliste për Reformën Zgjedhore, drejtonte gishtin nga Rama dhe i bënte apel Bashës. Reforma Zgjedhore duhej të garantonte zgjedhje të lira, të ndershme dhe larg krimit e korrupsionit politik.

As Olldashin e ndjerë dhe as Patozin nuk i dëgjoi kush. Ngelen dy britma të forta në zërin parlamentar dhe kaq. As Basha, as Rama, as Meta dhe askush tjetër nuk e vuri ujin në zjarr, gjithçka u la për në fund.

Basha nuk donte Reformë Zgjedhore dhe sistem të ri, ai mori gjysmën e qeverisë, ruajti sistemin, ashtu si dhe Rama, dhe të dy bashkë shkuan në zgjedhje.

Me apo pa blerje votash, ato u mbyllën pa asnjë incident, qetësisht dhe pa asnjë denoncim. PD nuk bëri asnjë ankimim. Pas shumë javësh, Luli u kujtua dhe filloi akuzat se votat ishin blerë,. Se megjithëse kishte gjysmën e qeverisë, korrupsioni politik kishte deformuar vullnetin e shqiptarëve. Reformë Zgjedhore nuk pati, por pati vetëm deformim të rezultatit.

Në katër vite, Basha heshti, nuk bëri një Reformë Zgjedhore. Bëri vetëm disa ndryshime ligjore për kriminalizmin e shit-blerjes së votës, kjo e nxituar dhe pa asnjë efekt.

Pati denoncime për shit-blerje kryesisht nga eksponentë dhe mbështetës të LSI-së.

Sot jemi 6 muaj pas zgjedhjeve, ndoshta me shumë, dhe askush nuk po hedh një hap konkret. Le të ketë një akt të vërtetë politik, për një Reformë Zgjedhore të plotë, që përfundimisht do të mbyllte debatin me pretendimin që është sistemi ai që sjell deformimin, por në fakt janë palët politike ato që e deformojnë.

As Basha dhe as Rama nuk po bëjnë asgjë konkrete për Reformën Zgjedhore, ndodhta me pazarin e 18 majit ata kanë mbyllur gjithçka, presin të afrojnë zgjedhjet dhe si gjithmonë në minutën e fundit të mos zgjidhin asgjë.

Ndoshta të veprojnë edhe në kurriz të partive të vogla, duke gjetur kleçka ligjore për ti penguar dhe për ti tërhequr zvarrë. Por deri tani kemi një fakt, asgjë për Reformën Zgjedhore, asgjë për sistemin elektoral, megjithëse zgjedhjet lokale janë në derë.

Palët bëjnë sikur kanë harruar, por në fakt më shumë se harresë, është një pazar që lihet në heshtje./ CNA.al