Gazetari investigativ arratiset nga Shqipëria/ Më goditën dhe kërcënuan me jetë

8 Dhjetor 2017, 17:45, Aktualitet CNA

Gazetari investigativ dhe aktori Bledar Naska, është detyruar që të arratiset nga Shqipëria, dhe shkak për këtë janë bërë kërcënimet e vazhdueshme ndaj tij për shkak të punës së tij si gazetar në një emision investigativ.

I kontaktuar nga CityNews.al, Naska u shpreh se ai është larguar nga vendi para disa javëve, dhe shkak për këtë kanë qenë kërcënimet e shtuara në numër kohët e fundit edhe pas lënies së punës si gazetar investigativ. Naska u shpreh se problemet vijojnë që nga viti 2005 kohë kur filloi të punonte si gazetar investigativ, dhe të denonconte shkeljet e ndryshme.

Mësohet se Naska është qëlluar nga disa persona të panjohur në kohë ndërsa një ditë tjetër ai është tentuar të hidhet në kanal me makinën e tij ndërkohë që po udhëtonte me familjen.

“Një herë më është dashur që të tërheq një denoncim pasi jo vetëm që nga policia nuk u bë asgjë, por se rreziku mund të shtohej edhe më shumë nëse unë nuk e bëja këtë gjë.
Një muaj e gjysmë më parë unë largohem nga Tirana në drejtim të qytetit të Gramshit për tu “fshehur” dhe pasi e kuptova që kërcënimet vazhdonin ndaj personit tim, unë vendosa të largohem nga Shqipëria. U nisa dhe mbërrita në Suedi vetëm që të shmang këto probleme dhe që jeta ime mos të jetë më në rrezik.”, -tha Naska për CityNews, ndërsa zbuloi se momentalisht ndodhet në shtetin Suedez.

Sikur të mos mjaftonte kjo, kërcënimet kanë vijuar në adresë edhe të bashkëshortes së tij, e cila lidhur me këtë ka bërë një denoncim në Polici.

“Ndihem vërtetë i shqetësuar pasi më “dt 5-12-2017” rreth orëve të vona të natës, bashkëshortes time e cila ndodhet në Shqiperi bashkë me dy fëmijët e mi, i dërgojnë një sms kërcënues në adresë të personit tim dhe ku citohej se “edhe aty ku jam fshehur, do t’më kërkojnë dhe do t’më zhdukin”, – thotë Bledar Naska, për çka bashkëshortja e tij ka bërë edhe një denoncim në polici një ditë më vonë.

Gazetari Naska, nuk është i pari që detyrohet të largohet nga vendi nga kërcënimet me jetë për shkak të detyrës. /CityNews