Zgjidhja kërkon lirimin e Albin Kurtit

25 Nëntor 2017, 10:08, Aktualitet CNA

Pas arrestimit ditën e djeshme të themeluesit të Vetëvendosjes, Albin Kurti, ka reaguar kryetari i partisë ZGJIDHJA, Koço Kokëdhima.

Në një postim në rrjetet sociale, Kokëdhima ka komentuar arrestimin e Albin Kurtit dhe ka pohuar se prangat në kyçet e Albinit, janë pranga për kurajon, guximin, trimërinë, vetëdijen dhe aftësitë e kombit tonë për të mbrojtur të drejtat legjitime të popullit të Kosovës dhe të Kombit Shqiptar.

Kokëdhima ka kërkuar lirimin e Kurtit dhe të gjithë të arrestuarve të tjerë të cilët kanë dalë hapur kundër përpjekjeve për të dhuruar tokat shqiptare një shteti tjetër.
Postimi i plotë:

?Sa herë që klasa politike në Kosovë ndihet në rrezik, prangat për Albin Kurtin janë gati. Gjithmonë kur bëhet fjalë për të hequr vëmendjen nga skandalet e mëdha të atyre që kanë qeverisur shtetin e ri të Kosovë, sa herë del në pah se ata e kanë tradhëtuar idealin e luftës për një Kosovë të begatë dhe duhet të largohen, qelia është gjithmonë gati për Albinin.

Arrestimi i djeshëm i themeluesit të Vetëvendosjes bëhet në një moment, kur partia që doli nga ?hiçi?, duke u mbështetur vetëm te populli i thjeshtë dhe në shërbim të çështjes kombëtare po rikonfirmon se është ajo forcë politike që qytetarët e Kosovës kërkojnë dhe që do ta udhëheqë vendin drejt prosperitetit.
Në zgjedhjet lokale që sapo u mbyllën, partitë e vjetra në Kosovë kanë marrë minimumin historik të votave. Dy qytetet më të mëdha Prishtina dhe Prizereni kanë konfirmuar deri më tani VV si forcë e parë fituese. Edhe në zgjedhjet e përgjithshme partia e themeluar nga Albin Kurti doli forcë e parë, por nuk pranoi t?i hynte rrugës së pazareve qeverisëse, duke zgjedhur opozitën deri kur populli i Kosovës të bashkohet në mënyrë unanime, rreth projektit të saj idealist dhe kombëtar.
Forca që themeloi Albin Kurti po i afrohet ditës që të qeverisë shqiptarët e Kosovës, të cilët, edhe pse derdhën aq shumë gjak e më pas u tradhëtuan, duan të futen më në fund drejt rrugës së demokracisë dhe shtetit modern me standarde europiane. Kjo i ka tërbuar të gjithë ata që lirinë dhe pavarësinë e Kosovës e shohin dhe e shfrytëzojnë si një plaçkë për t?u pasuruar për vete. Njësoj siç bëri edhe në Shqipëri me demokracinë dhe pluralizmin kjo klasë e jona politike në grahmat e fundit, që ZGJIDHJA është betuar mbi flamur dhe përpara popullit se do ta rrëzojë e përmbysë. Po përse e arrestojnë sot Albin Kurtin?
Sepse dy vjet më parw, bashkë me deputetët e tjerë të VV dhe madje edhe me kryeminstrin e sotëm në krah, Ramush Haradinaj (është arrestuar edhe Donika Bujupi, e cila në kohën e protestave ishte deputete e partisë së Haradinajt) dhe zëvendëskryeminstrin Fatmir Limaj, hidhnin bomba tymuese në parlament kundër një qeverie që nxitonte t?i falte troje shqiptare, Malit Të Zi! Duket qartë që ky akt i rëndë është hakmarrje e pastër ndaj një force politike, që kërkon ndryshim radikal në Kosovë dhe që populli po e përkrah çdo ditë e më shumë.

Prangat në kyçet e Albinit, janë pranga në kyçet tona, duan të burgosin kurajon, guximin, trimërinë, vetëdijen dhe aftësitë e kombit tonë për të mbrojtur të drejtat legjitime të popullit të Kosovës dhe të Kombit Shqiptar. Nderim për Albinin! Turp për ata që qëndrojnë pas përpjekjeve për të dhuruar tokat shqiptare një shteti tjetër!
ZGJIDHJA kërkon të lirohen menjëherë Albini dhe të arrestuarit e tjerë!? /CityNews