Kryeministria denoncon injorancën LSI-ste në administratën shtetërore

22 Tetor 2017, 17:36, Aktualitet CNA

Ndërkohë që nëpërmjet një urdhërese të shpërndarë punonjësve të vet në administratën zyrtare, selia qendrore e LSI u ka bërë thirrje të mos dorëzojnë çelësat, nga kryeministria ka ardhur si kundërpërgjigje publikimi i injorancës së disa militantëve të LSI-së që mbajnë detyra shtetërore.

Kështu, referuar deklarimit të kabinetit te Kryeministrit: specialisti i zyrës së pagave në ndërmarrjen shtetërore të transmetimit të energjisë elektrike është me arësim të mesëm, kur vendi i punës e parasheh me shkollë të lartë.

Zyrën e projektimit të impianteve e drejton një lsist që ka përfunduar për politikë agrare, ndërkohë që specialisti i sigurimit të telekomunikacionit është diplomuar për zooteknik.

E forta fare është se një tjetër specialisti i sektorit të telekomunikacionit megjithëse ka qenë nën masën e sigurisë ?arrest me burg?, ka vijuar të paguhet deri në fund të muajit shtator…

Këta janë vetëm një pjesë e vogël në detin e zullumeve që LSI ka bërë me 30% e pjesës që ka patur në administratën e koalicionit të shkuar qeverisës me PS-në, pasi qindra të tjerë të këtij kallupi i gjen në strukturat e Ministrisë së Bujqësisë, nga qendra deri në bazë. Ku drejtorë drejtorie të bujqësisë rezultojnë edhe të diplomuar për zjarrfikës. Sikurse gjen me qindra arsimtarë, ish oficerë, fermerë, bujq , ish karrocierë, berberë, kamerierë, saldator, ish policë, këngëtarë, aktorë,regjizorë të dështuar, burra,gra etj., të konvertuar në zyrtarë dhe që për të mbrojtur vëndet e punës të zaptuara falë dashurisë për LSI-në e Ilir Metën, janë gati të përballen nëpër gjykata.

Arradhën e injorancës dhe nepotizmit LSI-ist e ndesh me shumicë në Institutin e Shëndetit Publik, i cili, për të përballuar shpenzimet e administratës së militantëve LSI-st të qëndisur perfekt nga drejtori bashkëfshatar i Ilir Metës, Arjan Bregu, që prej 3 vitesh e drejton këtë institucion të rendësishëm të kërkimit shkencor, i ha për çdo vit buxhetiti tonë të taksapaguesve mbi dy miliard e gjysëm lekë. Pa i dhenë asnjë produkt justifikues. Ka edhe më shumë se kaq por ta mbyllim deri këtu listën e zullumqarëve me targën LSI për ta vijuan në ditët e ardhëshme./CityNews