Nga Arben VATA/Fjalimi i Gertës apo i Olldashit?

1 Tetor 2017, 09:50, Aktualitet CNA

Thuajse 4 vjet më parë, i ndjeri Sokol Olldashi, mbajti një fjalim të zjarrtë në Parlament, nëpërmjet të cilit vinte gishtin në plagën e politikës dhe demokracisë në Shqipëri ; krimin, korrupsionin, vjedhjen e votës dhe lidhjen e këtyre fenomeneve me rangjet më të larta të politikës së këtyre 25 viteve. Thuajse fiks 4 vjet më vonë, një zonjë e panjohur por mjaft e shkolluar nga Mirdita, hyn në atë sallë dhe akuzon politikën se ka lënë pas dore fshatin.

Të dy, edhe Sokoli, edhe Greta folën gjithë pathos dhe të revoltuar për realitetin. Sokoli ishte politikan dhe fliste pa letër, ndërsa zonja që për herë të parë shkelte në kuvend iu referua një letre të shkruar. Fjala e Sokolit u harrua për pak ditë në vorbullën e zhvillimeve të kohës, ndërsa pak javë më vonë ai u gjet pa jetë si pasojë e një aksidenti misterioz në makinë e tij. Ndërsa Gerta është tashmë në kulmin e famës dhe lavdisë së vet, e cila me shumë gjasë nuk do të ndalet me kaq.

Akulli u thye dhe nuk është çudi që një ditë atë ta shohim në listat e partive për zgjedhjet vendore apo ato të përgjithshme. Pavarësisht asaj që po thuhet për përdorjen ose jo të saj nga politika, ajo tashmë është idhulli i ri i shqiptareve te moshës së mesme. Ata shohin te ajo veten e tyre. Është e drejta e tyre për këtë. Edhe fakti që mallëngjehen nga fjalët e saj, që për hir të së vërtetës mund ti artikulojnë shumë e shumë persona të tjerë. Asaj iu dha mundësia dhe e shfrytëzoi. Foli për fshatin e saj në Mirditë, ku për rastësi apo jo, thuajse në të njëjtën kohë foli edhe ambasadori amerikan.

Në një takim me të rinjtë e Mirditës të nuk foli për problemet e fshatit, por të qeverisjes, pak a shumë njësoj sikurse problemet që artikuloi Olldashi në fjalën e vet 4 vjet më parë. Tani, ne jemi të lirë të zgjedhim mes fjalimit të Olldashit apo të Gertës ; të zgjedhim vetë se cili është më i rëndësishëm për cili është më i guximshëm. Nëse Gerta me të vërtetë guxoi, edhe pse shumë dyshojnë se ndoqi një protokoll të caktuar, atëherë i lumtë. Përndryshe nuk është çudi që një ditë qeveria e mblidhet në Prosek dhe të diskutojë për fshatin te ferma e zonjës. Ndërsa për ato që pati thënë Olldashi dikur dhe ambasadori amerikan sot, qeveria zgjedh më mirë të hesht I të orientojë qytetarët te shfaqje të tilla emocionesh në mënyrë publike.