E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Përshpirtja e qeverisë/ Edi Rama mban psalmin e rradhës

11 Shtator 2017, 09:28, Aktualitet CNA

Kryeministri i vendit Edi Rama ka shpalosur sot përreth një orë në parlament programin e tij qeverisës.

Rama e filloi me shkollimin e fëmijëve, më tej artikuloi problematikën në fusha të ndryshme shoqërore, shëndetësi, infrafstrukturë, rend, siguri dhe e mbylli me turizmin.

Fjala e kryeministrit Rama, nuk kishte asgjë më shumë se sa artikulimet e tij të shpeshta gjatë fushatës elektorare për zgjedhjet e 25 qershorit.

Edi Rama nuk dha asnjë shifër dhe fakt konkret se sa do rriten investimet, si do ulen taksat, sa do të jetë numri i administratës, si do të menaxhohet territori, si do të rritet rendi dhe siguria, apo si do të përmirësohet turizmi brenda një viti.

Si një eseist i shkëlqyer, Edi Rama filloi dhe mbaroi pa asnjë gjë konkrete përveç kërkesës drejtuar deputetëve që të mos ikin vitin tjetër jashtë shtetit, sepse do të kemi një sezon turistik fantastik, edhe ky një premtim ndoshta i vetmi i bërë konkretisht gjatë fjalës së tij.

Një fjalim ku Edi Rama nuk premtoi asgjë, por preku nga pak çdo fushë, thjesht dhe vetëm duke konstatuar dështimet e tij, por me një gjuhë që faturën ia linte të shkuarës, a thua se Rama nuk ka qenë katër vite kryeministër.

Ashtu siç pritej Rama premtoi 140 mijë vende pune, nga 220 mijë që kishte premtuar në fushatë. Kryeministri më shumë se konkret në shpalosjen e programit të tij, ishte njeriu që mediatikisht shpalosej si viktima e mandatit të fituar, a thua se Rama nuk kishte garuar për kryeministër, por e kanë vënë me zor në krye të qeverisë. Shumë fusha nuk i zuri aspak në gojë, fjalimi ishte një mirënjohje edhe për Lulzim Bashën dhe marrëveshjen me të. Mes rrjeshtave ai e vlerësoi opozitën por nuk harroi ta ngarkonte me përgjegjësi duke i kërkuar që integrimi i Shqipërisë të jetë një proces i përbashkët.

Rama nuk la pa theksuar edhe marrëdhëniet me Greqinë, fqinjin jugor, dhe kërkoi që të ketë një partneritet dhe marrëdhënie të ndërsjelltë midis palëve me respekt reciprok. Ai tha se Greqia është i vetmi vend që Shqipëtria ka probleme, a thua se Edi Rama këto katër vite nuk ishte Kryeministër i vendit.

Premtimi se vitin e ardhëshëm do të kemi sezon turistik fantastik me më shumë siguri, plazhe më të pastra dhe standarte për pushuesit, duket më shumë shashkë e kryeministrit, kjo për një fakt të thjeshtë. Çfarë e pengoi këto katër vite Edi Ramën të bënte atë që premton se mund ta bëjë për 6 apo 7 muaj? Gjithmonë turizmin e ka pasur vetë në kontroll.

Fjalimi i Ramës sot në parlament mund të quhet përshpirtje për qeverinë. Edi Rama thjesht mbajti psalmin e rradhës./CityNews