E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Cili është institucioni më kaotik i Edi Ramës!/Mbi 1 mijë padi në gjykatë brenda 2017-s

16 Gusht 2017, 12:03, Aktualitet CNA

Kryeministri Edi Rama ka deklaruar shpesh, që gjatë fushatës elektorale, se institucioni i Hipotekave është dikasteri më i kapur nga tepsia e pushtetit. Menjëherë pas fitores në zgjedhjet e 25 qershorit, i pari i qeverisë ndërmori dhe në hap konkret në pastrimin e këtij institucioni nga të korruptuarit, teksa iu kërkoi dorëheqjen të gjithë drejtorëve të Hipotekave në mbarë vendin.

Por, përtej deklaratave në media dhe asaj që thuhet në ekran, e vërteta është akoma më e rëndë në Zyrën e Regjistrimit të Pasurive të Patundshme dhe ky institucion është më kaotiku në administratën shtetërore. Gazeta ?Sot? ka bërë një kërim të përballjeve gjyqësore të qytetarëve me degët e hipotekave në të gjithë vendin.

Nga të dhënat që rezultojnë online në faqet e gjykatave administrative dhe të Gjykatës së Lartë, janë në proces gjykimi rreth 1 mijë raste, ndërkohë që mijëra të tjerë janë mbyllur. Sipas të dhenave të gjykatës, në të gjitha rastet janë paditur ZVRPP, pasi qytetarë të thjeshtë dhe institucione kanë vërejtur se ky institucion ka abuzuar apo ka gabuar me të drejtën e pronës.

Abuzimet në Hipoteka

Pak ditë më parë, KLSH me anë të një njoftimi për shtyp ka deklaruar se rreth 467 punonjës dhe zyrtarë të ZVRPP dhe ALUIZNI-t kanë abuzuar me detyrën. Më konkretisht, KLSH ka kryer rreth 40 auditime pranë këtyre institucioneve përgjatë viteve 2013-2017, nga të cilat 22 i kishte kryer pranë ZVRPP dhe 18 në Drejtoritë Rajonale të ALUIZNI-t.

Nga auditimet e kryera pranë këtyre institucioneve, KLSH konstatoi një sërë shkeljesh që konsistonin kryesisht; në vonesa në administrimin e praktikave dhe trajtimin e kërkesave në proces; regjistrimin e lejeve të ndërtimit mbi truallin shtetëror; regjistrimin e pronave me mbivendosje; mos evidentim të objekteve që do përjashtohen nga lejet e legalizimit; si dhe shumë shkelje të tjera. Për këto shkelje, KLSH ka rekomanduar: 137 masa me largim nga puna, 134 masa vërejtje deri në largim nga puna, si dhe ka kallëzuar penalisht 196 punonjës dhe drejtues të ALUIZNI-t dhe të ZVRPP.

Ndërkohë, KLSH ka ritheksuar se përsa i përket kallëzimeve penale nga 40 auditime që ka zhvilluar në total gjatë periudhës 2013-2017, në 36 prej auditimeve KLSH ka hartuar raporte dhe i ka dorëzuar pranë organeve përkatëse të prokurorisë ku binte në sy se shumica e të kallëzuarve penalisht kanë qenë ish-drejtues apo Përgjegjës Sektori dhe Specialistë. Gjithashtu, KLSH ka pranuar se deri më sot janë marrë një sërë vendimesh të prera nga ana e gjykatave për një sërë ish-zyrtarësh të ALUIZNI-t në qytetin e Shkodrës, Vlorës, Sarandës dhe Tiranës kurse sa i përket shkeljeve të bëra nga ana e zyrtarëve të ZVRPP, ende nuk janë bërë dënime nga ana e gjykatave./CityNews