Fahriu bashkohet me Çilin në mbrojtje të Bashës/Shtohet numri i ish-sigurimsave që e mbështesin

6 Korrik 2017, 10:22, Aktualitet CNA

Partia Demokratike po zhytet dita-ditës drejt një qorrsokaku pa rrugëdalje, pas rezultatit katastrofik në zgjedhjet e 25 qershorit dhe vendimit të Lulzim Bashës për të mos dhënë dorëheqjen. Vetëngrirja e Bashës nuk u pranua nga shumica e demokratëve dhe figurave më të rëndësishme e me peshë në PD.

Humbja dhe shpartallimi që Lulzim Basha i bëri PD-së gjeti dhe mbështetje. E mes të cilëve nuk mund të mungonte dhe botuesi i ?Gazetës 55?, Fahri Balliu, i shumëakuzuar si ish-bashkëpunëtor i ish-Sigurimit të Shtetit dhe punonjës i SHIK-ut së Bashkim Gazidedes.

Pas Henri Çilit, i cili doli hapur në mbështetje të Bashës një ditë pasi dolën rezultatet e zgjedhjeve, kur PD-së i mungonin mbi 200 mijë vota, tashmë në krah të tij është pozicionuar edhe Fahriu.

Ky i fundit ka shfrytëzuar gazetën e Henri Çilit për të dhënë mendimin e tij pro Bashës, teksa sulmon ashpër kritikët në PD, që sipas tij, janë angazhuar kundër gjatë fushatës elektorale.

Fahriu është botuesi i fletushkës me numër 55, por ka zgjedhur gazetën e Çilit për të dhënë mendim, pasi gazeta e tij nuk shitet, nuk ngjall asnjë interes te qytetarët dhe ka mbetur thjesht një numër më shumë në treg.

Fahriu, ky usta i vjetër i korrupsionit dhe klientelizmit politik, bashkon forcat me Çilin në mbrojtje të Bashës, të cilin në fakt vështirë se mund ta ndihmojnë këto zëra për të shpëtuar nga rezultati katastrofik PD-në. Bashës këta zëra thjesht dhe vetëm i dobësojnë më tej pozitat e tij të rrënuara në syrin e demokratëve.

Fahri Balliu ka një arsye të fortë, kur del në mbrojtje të Bashës. Ai kishte djalin e tij, Klevisin, në listën e Korçës, i cili ishte kandidatura më qesharake e këtyre zgjedhjeve, ai na tregoi vetë gjatë fushatës se nuk di ende të shkruajë shqip dhe u kthye në simbolin e një personazhi që nuk linte ditë pa bërë një skandal.

Sot, i ati i tij ka sulmuar kë ka mundur, me gojën e tij të pistë, por thjesht duke e dëmtuar më tej Lulin. Sa herë del Fahriu në mbrojtje të Lulit, aq më i dobët bëhet ky i fundit.

Fahriu nuk mund ta kuptojë se zëri i tij nuk mund ta mbrojë kurrë Bashën, por as zëri i Klevisit, që nga shtatori do jetë në Parlament. Babai i të birit duhet më parë të mësojë këtë të fundit dhe ta formojë atë politikisht, mision që duket i pamundur, pasi vetë Fahriu gjithmonë ka qenë një dështim në politikë./CityNews