Erion Piciri kërkon informim zyrtar për mohimin e kandidimit për kreun e PD-së

5 Korrik 2017, 13:27, Aktualitet CNA

Sot, kandidati per kreun e PD-se, Dr. Erion Piciri, ka depozituar nje kerkese per informim zyrtar tek Partia Demokratike, per mohimin e te drejtes se kandidimit. Ne kerkesen e tij ai shkruan:

“Me të drejtën time si kandidat, i kërkoj Partise Demokratike, një njoftim zyrtar me shkrim mbi motivet e refuzimit.

Mohimi i të drejtës së kandidimit duhet të ketë një mbështetje të fortë ligjore dhe statutore se ndryshe përbën një shkelje të rëndë të të drejtave politike, të garës së lirë dhe të ndershme, të funksionimit ligjor dhe demokratik të Partisë Demokratike. Partia që solli pluralizmin, të drejtën e kandidimit dhe votës së lirë, nuk mund t’ua mohojë këtë anëtarëve të saj. Kjo mund të preki drejtpërdrejt misionin e saj historik dhe vetë qëllimin e ekzistencës së një partie.

Privatisht jam njohur nga disa anëtarë të kryesisë së PD se refuzimi im është bazuar në mungesën e presupozuar të anëtarësisë. Ju bëj me dije se jam anëtar i PD-së prej 14 vitesh, nga data 2 tetor 2003. Në cilësinë e anëtarit, e kam pasur emrin në listë dhe kam votuar për garën për kryetar partie të PD-së në vitin 2013, tek shkolla 11 Janari në kryeqytet. Anëtarësinë e kam përmendur edhe tek rezumeja bashkëngjitur kërkesës për kryetar të PD-së dhe e gjeni të fotokopjuar bashkëngjitur kësaj kërkese. Megjithëse unë besoj se çdo parti e madhe dhe serioze si PD, i ka të dhënat e anëtarësisë.

Në rastin tim vërtetimi ka qenë lehtësisht i verifikueshëm se kam pasur bashkëpunim në nivelin më të lartë të lidershipit të partisë. Vetë kryetari i partisë ka pasur një fotokopje të dëshmisë time të anëtarësisë të dërguar me email, më datë 24 prill 2015. Në të njëjtën kohë aktiviteti im ka qenë i njohur brenda partisë. Në katër vitet e fundit jam përfshirë në dy fushatat parlamentare të PD-së: në Berat (2013) si këshilltar fushate dhe në Tiranë (2017) si pjesë e listës për deputet. Në këto katër vitet e fundit që kam jetuar në Shqipëri, kam këshilluar në periudha të ndryshme kryetarin e Partisë Demokratike dhe kam trajnuar tek selia e partisë (nëntor 2014- mars 2015) mbi 300 aktivistë partie nga i gjithë vendi për çështjet e lidershipit politik dhe fushatave elektorale.

Mbas këtij argumentimi, jam në pritje të njoftimit zyrtar mbi vendimin e refuzimit të kandidaturës time”./CityNews