Dështoi çadra apo Basha?

13 Maj 2017, 13:08, Aktualitet CNA

Ditën e sotme u zhvillua protesta e Partisë Demokratike dhe partive aleate të saj në Bulevardin ”Dëshmorët e Kombit”.

Kreu demokrat, Lulzim Basha në fjalën e mbajtur në podiumin e protestës tha se në shesh janë mbledhur 600 mijë vetë, por ajo që ra në sy është pikërisht pjesëmarrja e ulët e protestuesve, e cila bie në kundërshtim me fjalët e kryetarit të PD.

Kjo pjesëmarrje e ditës së sotme ka qenë shumë më e ulët krahasuar me pjesëmarrjen e protestuesve më 18 shkurt, pikërisht tre muaj më parë.

Për të dalë në një përfundim se pse ka ndodhur kjo dhe pse demokratët vendosën që sot pas tre muajsh ta braktisnin PD, duhet bërë një analizë për përgjegjësinë e këtij dështimi. Pra dështoi Basha me Republikën e Re, apo çadra e ngritur me 18 qershor?

Kreu demokrat në këtë qëndresë të gjatë prej 85 ditësh ka bërë akuza për qeverinë, premtime për Republikën e Re, negociata për zgjidhje dhe pa zgjidhje, por edhe kërkesën për qeveri teknike e sëfundmi dhe shtyrje zgjedhjesh.

Ditën e sotme ka pasur më pak pjesëmarrjes se kurrë ndonjëherë më parë në protestat e thirrura nga Partia Demokratike, pavarësisht justifikimit brenda PD se shumë prej protestuesve qëndronin në hije dhe nuk kapeshin nga kamerat. Ndërkohë Basha vetëm një ditë më parë paralajmëroi se sot do të mblidhej protesta më e madhe në 27 vite demokraci, por realisht në sytë e tij edhe ai sot pa pak njerëz.

Çfarë i ka penguar demokratët të dalin sot në protestë? Çfarë i ka penguar të pakënaqurit e qeverisë t?i bashkohen thirrjes së Lulzim Bashës për Republikën e Re? A po gabon ky lider, duke u futur në një rrugë pa krye dhe pa kthim mbrapa?

Elita dhe stafi i ngushtë i kreut demokrat, Lulzim Basha është përgjegjëse po ashtu sa ai vetë për këtë dështim. Përgjegjës për atë që ndodhi sot janë edhe krerët e degëve në rreth dhe Tiranë, por përgjegjësi kryesor është vetë Lulzim Basha, pasi ai e ka zgjedhur këtë staf, ai e ka zgjedhur këtë elitë, e cila siç duket nuk ngjit dhe ndoshta nuk ngjit as vetë Basha, apo fajin e gjithë kësaj e ka çadra.

Në fakt çadra e opozitës e ngritur prej 85 ditësh, solli efekte pozitive, por kur gjërat teprohen atëherë kthehen në kundërtën e saj që sjellin në fillim. Ndoshta Basha kërkonte të kalonte tej këtyre efekteve pozitive që pa fillimisht te kjo çadër prandaj vendosi ta tejkalonte rolin e saj pa menduar qorrsokakun ku do të futej.

Sido që të analizohet dështimi i kësaj proteste fillon te Basha, vazhdon te organizatorët dhe elita që kreu demokrat ka zgjedhur të ketë pranë vetes dhe çon në një përfundim.

Ndoshta ka ardhur koha që vetë lideri demokrat Lulzim Basha, bashkë me stafin më të ngushtë të tij, të bëjnë hapa pas dhe të lexojnë mesazhin dhe kritikën që sot i bënë shqiptarët për të mos e çuar Partinë Demokratike drejt rrënimit të mëtejshëm që askush, kurrë nuk do ta besonte se e ka mision./CityNews