E fundit!

11:13 Aktualitet

Protesta, "mollë sherri" në Konferencën e Kryetarëve/ Zhupa-mazhorancës: Po fabrikoni prova

Protesta e qytetarëve para Kryeministrisë ka sjellë debate...

Qeveria teknike dhe zgjedhjet/A tërhiqet dot Basha nga çadra?

3 Prill 2017, 15:05, Aktualitet CNA

PD vazhdon protestën e saj në ditën e 45. Kreu demokrat Lulzim Basha duket të ketë ngelur pa një zgjidhje për të shpëtuar nga vazhdimi i mëtejshëm i një kauze që vështirë se ka zgjidhje qeverinë teknike.

PD dhe Basha shpresonin që Ilir Meta të braktiste qeverinë dhe kusht për zgjedhjet të vendoste praninë e PD. Por duket se mesazherët e Metës tek Basha ishin të pavlerë. Kreu i LSI shkoi tek Rama, mbylli marrëveshjen e rradhës dhe e la Bashën dhe PD të pashpresë.

Kauza e PD për zgjedhje të lira dhe të ndershme është e vlefshme, dhe përgjegjëse për dështimin e tyre është qeveria dhe askush tjetër, por në rastin kur qeverinë nuk mund ta rrëzosh dhe faktorët si ke në favor, cila është zgjidhja pa mbështetjen e duhur?

Kauza vlen, por mbështetja duket e vogël dhe Basha i ngelur nën hijen e çadrës. Kryetarit të PD i duhet zgjidhja, pra qeveria teknike sipas tij dhe garancitë për zgjedhjet që të dalë nga çadra dhe të fillojë fushatën.

Zgjedhjet janë afër dhe PD është ende në çadër. Nuk ka ende shtabe, as kandidatë, në bazë është thuajse e shpartalluar, ndërkohë faktorët e tjerë politikë kanë filluar aksionin. Ata veprojnë ndërsa Basha është ende në çadër me 200 apo 300 vetë, kur shkon ai se kur iken zor se bëhen 50.

Shumë faktorë në analizë flasin se shanset e PD ekzistojnë, por ato janë të dobta dhe çadra më shumë se i shërbeu vetë forcimit të PD, i shërbeu faktorizimit të Ilir Metës dhe pazarit që ky rriti në tavolinë me Ramën. Ndërsa PD ngelet ende e ngujuar dhe me shpresa të pakta në çadrën midis zyrës të Ramës dhe Metës.

Opozita ka të gjithë të drejtën e saj të kërkojë zgjidhen e problemit elektoral në Shqipëri, ku vota shitet lehtësisht dhe shqiptarët duken të pandërgjegjshëm për vlerën e saj, por kauza e saj nuk mund të jetë pazari i Ilir Metës. Levizjen për garancitë elektorale ti kishte bërë që kur votoi Reformën në Drejtësi, ku dhe mund të kushtëzonte, po e bën sot, por më shumë se garanci për zgjedhjet kërkon kokën e Ramës, që në fakt është një pazar i lartë dhe mazhoranca është e bindur që të mos lëshojë më.

Por a i pranon Lulzim Basha garancitë që mund të vijnë prej kësaj mazhorance? A është e mjaftueshme oferta që po shkon tek PD nga PS-LSI dhe ndërkombëtarët? Basha ka folur për qeveri teknike ose zgjedhje ska. Ndërkohë qeveri teknike duket se nuk pranohet nga pala tjetër, por vetëm ofertë për garanci, kontrroll dhe transparencë në zgjedhje. Tani ngelet gjithçka në dorën e Lulzim Bashës, a është gati ai të braktisë çadrën për të filluar betejën e tij të parë elektorale parlamentare si kryetar i PD apo të mos lëshojë fare.

Zgjedhjet e ardhshme janë një betejë të cilën Basha e ka shumë të vështirë edhe sikur të ketë qeverinë teknike. Jo vetëm për shkak të deformimit të votës, por për faktin e bashkimit të mazhorancës së majtë dhe futjes në koalicion të faktorëve të djathtë, që janë faktorë thelbësorë.

PD i duhen votat, këto të fundit dalin në kuti nga mbështetja popullore dhe një frymë elektorale, të cilat fatkeqsisht i mungojnë krahasuar me frymën dhe mbështetjen e Rilindjes në 2013, një tjetër fakt që duket në disfavor. Qeveria e Ramës ka pakënaqësi popullore por Basha ende nuk është i besueshëm dhe nuk shihet si zgjidhje. Kjo ka krijuar jo pak ngërç tek opozita, e cila mendon se pakënaqësia ndaj Ramës shkon tek PD, por në fakt të majtët, dhe pjesa gri pragmatiste e kanë më të lehte të shkojnë tek Meta dhe PDIU apo FRD, tek këto të fundit mund të hyjë dhe shumë elektorat i djathtë. Zgjedhjet janë afër, mazhoranca mbylli pazaret, ndërsa Basha pret i pashpresë “tradhëtinë” e Ilir Metës që të ketë shansin e fitores.

Tërheqja duket shumë e vështrirë dhe mund ti jepte shumë kosto kryetarit të PD, por edhe pafundësisht nuk mund të qëndrojë aty. Pra Basha ndodhet në momentet më të vështira të tij politike. Një fjalë e urtë popullore thotë: Këmbët shtrihen sa ke jorganin. Këtë Basha ndoshta se kishte menduar dhe i shtriu pak më shumë me idenë se mund ta mbulonte Ilir Meta që përfundimisht e zbuloi fare./CityNews