Ilir Meta, segmenti i korruptuar që nuk braktis dot Ramën

22 Shkurt 2017, 18:27, Aktualitet CNA

Ilir Meta po mban prej kohësh nën tension mazhorancën por së fundi dhe opozitën. LSI po sillet si forcë kryesore në vend. Thirrjeve nga eksponentë të opozitës dhe aleatët e Bashës në protestë, Ilir Meta i ka kaluar në heshtje. Ai duket se pret masivizimin e protestës për tu larguar, por ky më shumë mbetet thjesht një justifikim.

Si gjithmonë kreu i LSi vepron kur gjithçka është në përfundim, ai e nuhat dhe del me kupën e fituesit në dorë. Lëvizjet e tij këtë e kanë treguar sistematikisht kohët e fundit. Ilir Meta po luan me opozitën duke e dëmtuar edhe më tej rolin e saj. Ai mban me shpresë por nuk bën asnjë veprim dhe reagim konkret. Shpesh lëshon sinjale tensionuese në mazhorancë, por mandati i saj ecën i plotë pa asnjë shqetësim, kur gjerat rëndohen heq ministrat e tij, ndonjë e hedh edhe në kosh në kulmin e betejës.

Meta e di mjaft mirë pozicionin e tij politik, ai është çelësi i zgjidhjes së një krize që pritet të zgjasë. Lajmi se dje në mbrëmje ishte ofruar dorëheqja e Metës nga drejtimi i Kuvendit por edhe propozimi për largimin e Ramës është një gënjeshtër dhe intrigë që nuk ndalet. LSI shpërndan lajme të rreme në media dhe vetë mbyll çdo pazar duke qëndruar në qeveri.

Ilir Meta po luan një lojë të pisët duke dëmtuar më tej opozitën dhe shumë parti parlamentare që kërkojnë zgjedhje të lira. Vetë LSI ka qenë viktime e një marrëveshjeje elektorale të vitit 2008, por Meta nuk kërkon anulimin e saj dhe një marrëveshje të re megjithëse sot i ka të gjitha mundësitë. Ai qëndron në llogoren e tij duke shfrytëzuar kodin aktual dhe rrjep pushtetin në çdo segment që ai drejton.

Njeriu që shihet si konsensuali dhe balancuesi i pushteteve në fakt, është hajduti me çizme që flet në emër të konesesusit dhe hapave pro europianë të vendit. Kreu i LSI qëndron nën prehrin e Edi Ramës dhe keqazi përdoret prej kryeministrit për lojëra dhe intriga politike, të cilat në përfundim po çojnë në dëmtimin e opozitës, e cila fatkeqësisht ka hedhur vështrimin nga Ilir Meta, segmenti më i korruptuar dhe më abuziv i pushtetit në Shqipëri.

Opozita tashmë është në momentin kur duhet të pozicionohet hapur dhe fort kundër Metës duke e bashkuar edhe atë me Edi Ramën si fatkeqësi dhe përgjegjës politik njësoj si kryeministri. Thjesht dhe vetëm se flet ndryshe, por vepron dhe ka të njëjtin mentalitet dhe aksion politik si kryeministri. Banda në pushtet ka dy krerë, të gjatin debatues dhe të shkurtrin ?konsensual?./CityNews