E fundit!

11:00 Aktualitet

Vijojnë përplasjet në kantierin e aeroportit të Vlorës/ Kërkohet ndërhyrja e policisë, reagon Behgjet Pacolli

Vazhdojnë tensionet në kantierin e aeroportit të Vlorës. P...

Drejtësia kosovare në udhëkryq të madh/ Reforma e 2010-s dështim

14 Shkurt 2017, 08:02, Aktualitet CNA

Avokati Tomë Gashi thekson se në vitin 2010 është e vërtetë se ka pasur rizgjedhje të gjyqtarëve dhe prokurorëve dhe shumica e tyre i kanë kaluar këto teste, edhe pse një pjesë e tyre nuk kanë qenë në nivel ndoshta edhe të dijeve elementare të drejtësisë. Sipas tij, testi nuk ka qenë i përpiluar në atë formë të tillë, saqë do të kërkonte një njohje të ligjeve, por më tepër, siç tha, është kërkuar një aspekt etik i gjyqtarëve dhe prokurorëve, gjë që shumica e kanë kaluar

Asnjëherë nuk pati një reformë të vërtetë, të thellë dhe serioze

Përderisa nuk do të ndodhë një lloj ‘Vettingu’ i ngjashëm me atë si në Shqipëri, Gjyqësori kosovar do të mbetet i njëjti dhe pa ndryshime, kanë vlerësuar analistët dhe njohësit e kësaj fushe, derisa kanë konsideruar se edhe atëherë kur është bërë ndonjë ndryshim siç pretendohet në 2010-n, është bërë me afrimin dhe punësimin në organet e drejtësisë të njerëzve vasalë dhe pakurrizorë, të cilët s’kanë as identitet personal e lëre më identitet shtetëror. Ndaj është shtruar edhe çështja se a është tanimë koha e fundit për ta pastruar drejtësinë nga të dyshuarit për korrupsion dhe vepra të tjera inkriminuese në Gjyqësor e prokurori, përmes një reforme të thellë siç është ajo e ‘VETTING’-ut në Shqipëri. Po ashtu është ngritur pyetja se pse po humbet koha dhe çka po presin Kuvendi e Qeveria e Kosovës, pastaj KGJK-ja e KPK-ja për të iniciuar edhe zyrtarisht ndryshimet me reformën e madhe në drejtësi dhe rrjedhimisht edhe dekriminalizimin e politikës e institucioneve të shtetit!? Zëdhënësja e KGJK-së, Aishe Qorraj- Berisha, në një prononcim për gazetën “Kosova Sot” ka bërë me dije se në vitin 2010 me ndihmën e SHBA-së dhe BE-së ka filluar procesi i riemërimit të gjyqtarëve, derisa, sipas saj, për të çuar përpara këtë proces është themeluar edhe Komisioni i Pavarur Gjyqësor dhe ai Prokurorial. “Gjatë këtij procesi të gjithë kandidatët i janë nënshtruar një procesi të verifikimit dhe vlerësimit. Në këtë çështje është bërë edhe vlerësimi i integritetit personal të kandidatëve. Si rezultat i këtij procesi, një numër i madh i gjyqtarëve nuk kanë mundur të inkuadrohen më në Gjyqësor”, ka theksuar zëdhënësja e KGJK-së.

Kaluan gjyqtarë e prokurorë me dije elementare

Avokati Tomë Gashi mendon se është krejtësisht e kundërta e kësaj, ngase, siç tha, në vitin 2010 është e vërtetë se ka pasur rizgjedhje të gjyqtarëve dhe prokurorëve dhe shumica e tyre i kanë kaluar këto teste, edhe pse një pjesë e tyre nuk kanë qenë në nivel ndoshta edhe të dijeve elementare të drejtësisë. Sipas tij, testi nuk ka qenë i përpiluar në atë formë të tillë, saqë do të kërkonte një njohje të ligjeve, por më tepër, siç tha, është kërkuar një aspekt etik i gjyqtarëve dhe prokurorëve, gjë që shumica e kanë kaluar. “Andaj, unë mendoj se derisa nuk ndodh një lloj ‘Vettingu’ si në Shqipëri, ne do të kemi Gjyqësor të njëjtë, por faktikisht është duke u vërtetuar se politika e mban nën kthetrat e veta sistemin juridik të Kosovës vetëm atëherë kur është e interesuar për çështje konkrete dhe gjithmonë vijmë në fjalë të njëjta, se derisa nuk kemi ndryshime politike, nuk do të ketë as ndryshime në sistemin juridik të Kosovës”, theksoi Gashi. Sipas tij, me fillimin e punës së Gjykatës Speciale do të kemi detyrimisht edhe ndryshime politike. “Dhe, ndoshta e mira e punës së asaj gjykate do të jetë që pas ndryshimeve politike të detyrueshme disa persona dorëhiqen përfundimisht nga skena e lartë politike në Kosovë dhe për rrjedhojë do të kemi edhe ndryshime në sistemin juridik të Kosovës, ndryshime pozitive”, ka deklaruar për gazetën “Kosova Sot” avokati Tomë Gashi.

Po të varet nga shqiptarët, nuk ka kurrë reformë

Deputeti nga radhët e koalicionit në pushtet nga LDK-ja, Adem Salihaj, thotë se institucionet e Kosovës, përfshirë Presidencën, Kuvendin, Qeverinë dhe të gjitha segmentet e tjera qeveritare asnjëherë nuk do të reformohen dhe pastrohen, derisa, sipas tij, në to dominojnë eksponentët e krimit të organizuar dhe korrupsionit. “Ndërsa, ‘VETINGU’ në Shqipëri është bërë nga amerikanët, sepse po të varej nga shqiptarët, ai nuk do të bëhej kurrë. Ndërkaq, sa i përket reformës, në Kosovë reforma kuptohet si lojë fjalësh dhe si mashtrim, vetëm sa për ta mashtruar qytetarin edhe për një kohë, derisa të gjendet një ‘reformë’ e re”, ka spikatur për gazetën “Kosova Sot” deputeti nga radhët e koalicionit në pushtet nga LDK-ja, Adem Salihaj. Ndërsa profesori universitar, Mazllum Baraliu, ka thënë se shoqëria kosovare në përgjithësi fatkeqë- sisht nuk është e prirur sa duhet për reformim në asnjë fushë të jetës dhe veprimtarisë institucionale, dhe rrjedhimisht as në fushën e drejtësisë, derisa, sipas tij, në radhë të parë reformat do duhej të ndodhnin në drejtësi, por, siç tha, për fatin e keq edhe pas kaq vitesh shoqëria kosovare nuk ka qenë e gatshme për të bërë reforma të mirëfillta dhe të vërteta në drejtësi. Sipas tij, as bashkësia ndërkombëtare nuk ka arritur asnjëherë që të instalojë reforma të mirëfillta në drejtësi. “Andaj, konsideroj se është më se e domosdoshme, por dhe imperativ kohor që të ketë reforma të mirëfillta në drejtësi dhe në gjyqësi brenda saj, derisa në këtë drejtim shembulli më i mirë dhe më i freskët që ka filluar të ndërtohet me ndryshimet kushtetuese në Shqipëri siç është Ligji për ‘Vettingun’ “, potencoi ai./Kosova Sot