Skaneri i doganës në Durrës detekton “miun” dhe nuk sheh “ariun”

9 Shkurt 2017, 19:06, Aktualitet CNA

Në 29 janar 2017 policia në Portin e Durrësit kapi 450 Kg. kanabis të fshehura mjeshtërisht në këmbët e arkave plastike bosh, që përbënin ngarkesën e kamionit Scania me targa AA 822 OS. Sado mirë, që e kishin fshehur kanabisin trafikantët, skanerit të vendosur nga koncesionari në Doganën e Durrësit nuk i shpëtoi pa u detektuar 550 Kg. kanabis. Vetëm një javë më pas dogana italiane në bashkëpunim me policinë kufitare dhe financierët e Portit të Barit zbuluan tre klandestinë shqiptarë të fshehur në një kamion, që sapo kishte zbritur nga trageti

?Bari? i nisur nga Durrësi. Kamioni me targa serbe kishte shofer serb, por italianët pasi e hetuan ngjarjen konkluduan, që shoferi nuk kishte dijeni për klandestinët e futur fshehurazi në kamion. Tre klandestinët ishin fshehur në mes të ballove me sfungjer të ngarkuara në kamion. Dy nga klandestinët u dëbuan menjëherë për në Durrës me tragetin e rradhës, sepse ndaj tyre kishte urdhra dëbimi nga Italia të lëshuara nga Prefekti i Belluno-s. Klandestini i tretë, 32 vjec u dërgua në Burgun e Barit në gjendje arresti, sepse Gjykata e Brindizit në 2016 e kishte dënuar për gjobëvënie.

Ky episod tregon edhe një herë se,ndonëse skaneri i doganës së Durrësit është më modern se ai i doganës në Bari madje edhe se sa ai i doganës së Gjenovës, nuk ka siguri për kontrolle të rregullta të automjeteve dhe ngarkesave të tyre. Të zbulosh me skaner drogën e fshehur mjeshtërisht dhe mos zbulosh 3 njerëz është tepër. Kësaj rradhe italianët ishin me fat se kishin të bënin me keqbërës ordinerë, po nëse nesër do kenë të bëjnë me terroristë, cfarë do të ndodhë vallë?

Pikërisht për të tillë skenarë të rastit më të keq një delegacion ekspertësh i Rojes Bregdetare Amerikane inspektoi të gjitha masat e sigurisë dhe mirëfunksionimin e pajisjeve përkatëse të sigurisë (kamerave të mbikqyrjes, dyerve rrotulluese, detektorëve të radioaktivitetit, lexuesve e memorizuesve të targave të makinave, që hynë në port) të vendosura në Portin e Durrësit. Delegacioni zhvilloi një takim pune me drejtorin e Autoritetit Portual Durrës, me kapitenin e Kapitanerisë së Portit të Durrësit dhe specialistë të sigurisë (Security) detare./GJERGJ THANASI