LSI publikon listën e kandidatëve për deputetë në Qarkun e Korçës/ Ja emrat

7 Shkurt 2017, 10:58, Aktualitet CNA

LSI, ashtu si dhe socialistët, është duke bërë llogaritë e saj elektorale. Megjithëse ende nuk ka një vendim final, por me shumë gjasa Ilir Meta do të jetës sërish në koalicion me Edi Ramën.

Në qarkun e Korçës, LSI tashmë ka konfiguruar listën e kandidatëve për deputetë dhe kryesuesit e saj. Ilir Meta pretendon të kapë të paktën dy mandate, një më shumë se në vitin 2013, ku për disa qindra vota nuk mundi të siguronte mandatin e dytë brenda koalicionit.

Në zgjedhjet e katër viteve të shkuara, LSI mundi të siguronte rreth 15 mijë vota. Në rast se LSI do të jetë sërish në koalicion me socialistët në qarkun e Korçës, duke analizuar votat e 2013, por edhe një ulje të mundshme të socialistëve, do të mjaftonin të paktën 1 mijë vota që LSI të siguronte mandatin e dytë. Kjo mundësi i jepet tashmë në koalicion edhe nga fakti se PDIU, aleatja më e re në koalicion, ka rreth 2 mijë vota në këtë qark. Pra, LSI me ndihmën e PDIU, mund të sigurojë dy mandate në qarkun e Korçës, në rast se do të mund të ruajë votat e 2013 dhe të ketë një ngritje prej 5-10%.

Burime të sigurta i thanë CityNews se emrat që Ilir Meta do kandidojë në Korçë janë të ndryshëm nga ata të vitit 2013. Listën pritet ta kryesojë ministri aktual i Bujqësisë, Edmond Panariti, i cili është me origjinë nga zona e Korçës. Një nga drejtuesit më të lartë të LSI, ministër dhe politikan karriere, vendoset në Korçë të kryesojë listën për të siguruar mandatin e dytë, jo si një lojë, por si një bast i Ilir Metës.

Panariti kandidon në një zonë, ku bujqësia është thembra e Akilit. Fusha e Korçës dhe Devollit janë të lidhura fort me bujqësinë, me kreditë dhe investimet dhe gjithçka tjetër sjell Ministria e kësaj fushe për fermerët.

E dyta në listë pritet të jetë ministrja e Integrimit, Klajda Gjosha, e cila prej disa kohësh ka mbuluar rrethin e Pogradecit. Një zonë ku LSI e konsideron si pasion të saj për një aventurë personale të Ilir Metës, ku më 2015 humbi bashkinë, por LSI ishte thuajse barazim në votat e saj me demokratët dhe ka një peshë të madhe në Këshillin Bashkiak. Në vitin 2013, vetëm në rrethin e Pogradecit, LSI siguroi mbi 9 mijë vota, gati 60% të totalit të votave në gjithë qarkun. Një zonë ku Gjosha po punon prej disa kohësh, duke u përpjekur të ruajë balancat dhe të bashkojë rrymat e ndryshme brenda LSI.
Emri i tretë në listë është ai i deputetit aktual të LSI, Pirro Kapurani. Një deputet skandalesh, i akuzuar për korrupsion, simboli i klientelizmit, batakçizmit dhe korrupsionit klientelist në Korçë. Njeriu që emëron dhe shkarkon drejtorë sipas pazarit se kush e paguan më shumë dhe këtë nuk e themi ne. Mjafton të përmendim disa emërime dhe shkarkime drejtorësh të korruptuar nga Burgu i Drenovës te Drejtoria e Patentave, të cilët hiqen dhe kthehen në detyrë, për të kuptuar vlerat e Pirro Kapuranit. Pa folur për ndonjë drejtoreshë poste apo gjetkë, që rrjepin administratën e personelin gjoja me kuota anëtarësie për t?i çuar në xhepat e partisë dhe deputetit.

Kapurani kalon i treti në listë, pra bie me dy vende, pas një marrëveshjeje me Ilir Metën. Ky i fundit deklaroi se nuk do të ketë më biznesmenë ne listat e LSI dhe zgjidhja është një tjetër mënyrë, vendos politikanin në krye, biznesmeni vendoset i treti.

Pra, sipas marrëveshjes, në rast se LSI merr dy mandate, Edmond Panariti ose Klajda Gjosha në çdo rast do të jetë pjesë e kabinetit të ri qeveritar, çka sjell automatikisht që mandati të merret nga Pirro Kapurani. Të vetmit raste kur ish-kryesuesi i listës të vitit 2013 ngelet jashtë Parlamentit është kur LSI del në opozitë, ose Panariti nuk bëhet ministër dhe LSI merr vetëm një mandat.

Pra, mesa duket basti i Ilir Metës është për dy mandate dhe ai kërkon që t?i sigurojë me çdo kusht ato, duke vendosur të tretin biznesmenin, që të luftojë fort në qytetin e Korçës. Pra, në zgjedhje LSI do ketë tre fronte, fushën e Korçës të mbuluar nga Panariti, Pogradecit të mbuluar nga Gjosha dhe Devollin të mbuluar nga Kapurani./CityNews