PDIU prezanton strukturën organizative në prag të zgjedhjeve

1 Shkurt 2017, 19:38, Aktualitet CNA

Dega e Partisë për Drejtësi, Integrim dhe Unitet (PDIU) Durres ka prezantuar ditën e djshme në një takim me aktivistë të saj strukturën e re organizative. Kjo strukturë është prezantuar në prag të zgjedhjeve parlamentare të 18 qershorit, në të cilat PDIU hyn me ambicie të forta për të nxjerrë të paktën një deputet për në parlamentin e ardhshëm.

Në takim ka marrë pjesë deputetja e PDIU-së Znj. Mesila Doda si dhe drejtuesit e degës lokale të PDIU-së, kryetari Krenar Lasko, nënkryetari Gilbert Sulejmani, Artan Sulejmani, Tahsim Besho, Edmond Bejko etj. Struktura e re organizative është prezantuar nga kryetari Krenar Lasko, i cili theksoi se kjo strukturë është hartuar dhe përzgjedhur me kujdes me qëllimin për të zhvilluar një fushatë zgjedhore të suksesshme për të arritur objektivat që PDIU ka në zgjedhjet e 18 qershorit. IMG-20170201-WA0002 (1)

Takimi është përshëndetur edhe nga deputetja Mesila Doda e cila ka komentuar ngjarjet e politikës aktuale si dhe të asaj rajonale. Znj. Doda ka theksuar se PDIU vazhdon të jetë e patundur në qëndrimet e saj për miratimin e një rezolute në parlament për genocidin e ushtruar ndaj popullsisë çame. Deputetja Doda ka shtuar se PDIU është një forcë politike mjaft e organizuar dhe kjo gjë do të reflektohet edhe në rezultatet e pritshme të zgjedhjeve parlamentare të 18 qershorit.

Në lidhje me degën e PDIU-së në Durrës në këto zgjedhje pritet të vendoset në krye të listës një kandidaturë gjithpërfshirëse dhe e fuqishme në mënyrë që pas zhvillimit të zgjedhjeve PDIU të marrë për herë të parë një deputet edhe në qarkun e Durrësit. Kjo ambicie bazohet në forcën dhe mbështetjen që komuniteti çam ka në Durrës, i cili pritet që të bashkohet për të votuar listën që mendohet të nxjerrë emrin fitues për zgjedhjet e ardhshme.

Burime jozyrtare nga PDIU kanë bërë të ditur se me shumë mundësi në krye të listës pritet të jetë kryetari i saj Krenar Lasko, ndonëse kjo kandodaturë pritet të konfirmohet edhe zyrtarisht gjatë javëve të ardhshme. Z. Lasko ka riorganizuar degën lokale të PDIU-së në dy vitet e fundit dhe mendohet se është një emër bashkues për të gjithë komunitetin çam në mënyrë që votat të shkojnë të gjithë në favor të kandidatit të tyre.

Nga Gjergj Thanasi