E fundit!

11:24 Aktualitet

SPAK merr të pandehur ish-kryebashkiakun socialist

SPAK ka marrë të pandehur ish-kryebashkiakun socialist të ...

Mbyllet gara për KLGJ dhe KLP/Ja 32 gjyqtarët e prokurorët që kandidojnë

17 Janar 2017, 07:51, Aktualitet CNA

Këshilli i Lartë Gjyqësor dhe Këshilli i Lartë i Prokurorisë, shumë shpejt pritet që të nisin nga puna. Pavarësisht tentativave të politikës për të zvarritur reformën në drejtësi, tashmë ka nisur zbatimi i saj. Dje është mbyllur aplikimi për dy organet më të rëndësishme, siç janë KLGJ dhe KLP. Teksa deri pak ditë më parë u vu re një neglizhencë dhe mungesë interesi nga radhët e gjyqtarëve, dje ka pasur fluks aplikimesh. Gazeta ka siguruar listën e kandidatëve nga radhët e gjyqtarëve dhe prokurorëve. Janë 32 persona që kanë shfaqur interes për të marrë në dorë frenat e drejtësisë shqiptare. \

Ajo që bie në sy është interesi i ulët i gjyqtarëve dhe prokurorëve për të qenë pjesë e dy institucioneve të reja që u krijuan nga reforma në drejtësi. Nga 800 gjyqtarë dhe prokurorë në të gjitha gjykatat dhe prokuroritë e vendit, vetëm 32 prej tyre kanë aplikuar për vendet në Këshillin e Lartë Gjyqësor dhe Këshillin e Lartë të Prokurorisë. Nga gjyqësori ku përzgjidhen 6 anëtarë, numri i garuesve mbetet i ulët çka automatikisht do të sillte përzgjedhjen direkte të të gjithë aplikantëve.

Sa u përket emrave që kanë shprehur interes për të qenë pjesë e këtyre organeve vlen të përmendet kandidimi i drejtuesit të Prokurorisë së Vlorës, Ramadan Troci si dhe i drejtorit të hetimit në Prokurorinë e Përgjithshme, Kosta Beluri. Gjithashtu mund të përmendim edhe gjyqtarë të Gjykatës së Lartë, të cilët kanë shprehur interes. Të tillë janë Medi Bici dhe Artan Zeneli.

Po ashtu mes listës së 32 kandidatëve janë edhe emra të tjerë si: Ilir Toska nga Gjykata e Apelit Tiranë, Nertila Kosova nga Gjykata e Apelit për Krime të Rënda, Dritan Hallunaj nga Gjykata e Shkallës së Parë, Artan Laze nga Gjykata e Rrethit Tiranë etj. Duhet theksuar gjithashtu se rritja e numrit të kandidaturave për këto dy organe erdhi vetëm pak ditë pasi mazhoranca u bëri thirrje të interesuarve që të kandidonin për këto organe të reja të sistemit të drejtësisë.