Komisioni i Çështjeve Sociale/ Rekord Pjesëmarrjeje, shëndetësia dominuese

14 Janar 2017, 20:38, Aktualitet CNA

Komisioni për Punën, Çështjet Sociale dhe Shëndetësinë ka disa veçori që e dallojnë nga komisionet e tjera parlamentare: është komisioni i vetëm që drejtohet nga dy deputete gra, Vokshi (PD) dhe Spahia (PS), ka numrin më të lartë të grave deputete në përbërje (8 nga 16 deputetë), si dhe janë anëtare aty kryetaret e organizatave më të mëdha të grave politike në Shqipëri, kryetarja e forumit të grave në PS (Xhaçka) dhe në PD (Vokshi).

Në të dhënat monitoruese të Institutit të Studimeve Politike për periudhën shtator-dhjetor 2016 këta tre faktorë duket se nuk kanë arritur të bëjnë diferencën përmbajtjesore midis këtij komisioni dhe komisioneve të tjera parlamentare. Në Komision ka pasur prani disa herë të ministrit të shëndetësisë, ka qenë ministri i punës si dhe një numër i madh zyrtarësh që mbulojnë çështjet sociale e shëndetësore në vend. Krahasuar me komisionet e tjera ky komision ka pasur prani të lartë edhe të grupeve të interesit, sidomos në debatet për ligje të veçanta që lidhen me to.

Gjithsesi, të dhënat cilësore të debatit të zhvilluar në Komision rezulton se dominuese është retorika politike dhe mos-rakordimi midis dy drejtuesve kryesore të komisionit. Në të dhënat sasiore, rezulton se një e katërta e komisionit nuk ka folur në asnjë nga 14 mbledhjet e Komisionit (përkatësisht, Xhaçka e Pendavinji (PS), Tavo (LSI) dhe Feracaku (PKD). Vetëm në një rast ka disktuar edhe drejtuesve e PDIU, Doda. Nga ana tjetër, diskutuesit dominues në mbledhjet e Komisionit janë përvec drejtuesve kryesore Vokshi e Spahiu, edhe deputetet Halimi e Deda (PD), si dhe Alhysa (PS). Rol aktiv në debate kanë pasur edhe deputetët mjekë Keta e Mihaj (PD), si dhe Bejko (PS). Vlen të theksohet se me cilësinë e anëtares zëvendësuese, deputetja A.Rista ka marrë pjesë në katër mbledhje, me po kaq diskutime.

Në pjesëmarrjen në komision është interesant fakti se të paktën 7 deputetë kanë pasur 100% pjesëmarrje, duke vendosur rekord pjesëmarrja në raport me komisionet e tjera. Për më tepër, në 7 raste të tjera pjesëmarrja është 90%, gjithashtu tregues dominues. Dy deputetët më me pak pjesëmarrje i përkasin qarkut Korçë dhe kanë nivel 50% pjesëmarrje, pra shumë të lartë në krahasim me komisionet e tjera./ISP