Dashamir Shehi: PD të mos hapet vetëm për drejtorët dhe punonjësit e bashkive

8 Janar 2017, 10:21, Aktualitet CNA

Kryetari i Lëvizjes për Zhvillim Kombëtar, Dashamir Shehi, fajëson dy partitë e mëdha për shtyrjen e reformës zgjedhore. Në një intervistë për gazetën SOT, Shehi thotë se PD dhe PS duhet të kishin avancuar me ndryshimin e ligjit zgjedhor. Sipas Shehit, në këtë situatë politike që nuk jep garanci për mbajtjen e zgjedhjeve të drejta, është e nevojshme të krijohet një qeveri teknike që do t?i jepte besueshmëri procesit zgjedhor. Ndërkaq, ai komenton edhe iniciativat e fundit të kryetarit të PD, Lulzim Basha, në kuadër të rinovimit të partisë më të madhe opozitare. Aleati i demokratëve shprehet se Basha duhet të hapë partinë për qytetarë të përgatitur dhe jo për punonjës bashkish. Sa i përket marrëdhënieve të Bashës me ish-kryeministrin, Shehi mendon se duhet të vendoset një distancë. Ai i sugjeron Bashës që të jetë më i vendosur, ndërsa Berishës të distancohet nga drejtimi i PD.

Kryetari i PD javët e fundit ka ndërmarrë disa nisma për hapjen e partisë, futjen e të rinjve në listat për zgjedhje dhe siç thuhet në këto zgjedhje në krye të shtabeve elektorale do të largojë ?gardën e vjetër? dhe do t?i zëvendësojë me figura të reja. Si i komenton këto iniciativa në funksion të zgjedhjeve?

Nuk shoh ndonjë gjë të keqe, megjithëse jam kundër kësaj ndarjes të rinj dhe të vjetër. Të vjetër dhe të rinj duhen ndarë nga mënyra se si gjykojnë, jo nga mosha. Një sinjal i fortë i rinovimit të së djathtës shqiptare për nga mënyra se si do t?i afrohemi shqiptarëve duhet bërë. Basha duhet të jetë më i hapur, më i lirë, më i vendosur. Duhet të kuptojë që në finale protagonisti i parë duhet të jetë ai vetë, edhe përgjegjësia edhe lavdia, do të jenë të tijat. Këtë zoti Basha duhet të kuptojë, e thënë më shqip, këtë këmborë e djathta shqiptare ia ka varur zotit Basha dhe duhet ta tundi. Kjo është kryesore. Sigurisht që nuk mjafton vetëm zoti Basha, duhen shumë personazhe të tjera. Kjo që thotë hapje e partisë, nuk do të thotë të hapësh partinë për disa drejtorë e disa shefa bashkie, se nuk e bëjnë këta partinë. Këta janë thjeshtë nëpunës administrate por duhet ta hap realisht për qytetarët që janë dikushi, që janë zëra brenda komunitetit të vetë dhe duhet ta kuptojë për herë të parë brenda PD, që filozofia e zgjerimit shkon duke bashkuar ata që gjykojnë ndryshe, ata që gjykojnë njësoj nuk kanë rëndësi, si 1 si 100 janë po njësoj. Kur të zgjerohesh me ato që janë ndryshe nga ty, shpesh herë edhe kundër teje, atëherë je zgjeruar realisht.