web counter
LEXO PA REKLAMA!

SHKARKO APP

App Store
Google Play

E fundit!

x

Mimoza Hafizi: Ja kush e financon LIBRA-n

5 Janar 2017, 18:20, Aktualitet CNA

Deputetja Mimoza Hafizi shprehet se LIBRA eshte nje organizate politike e ngritur mbi parimin e vetëfinancimit. Përmes një positmi ne rrjetet sociale, ajo shkruan se në dy muajt e parë të saj, LIBRA ka mbuluar mbi 70% të aktivitetit nga kuotat e anëtarësisë, kurse pjesa tjetër është mbuluar nga sponsorizime po nga anëtarët e saj.

Ajo nënvizon se së bashku me deputetin Ben Blushi do nisin së shpejti kërkesën për ndryshime ligjore që kufizojnë financimet e partive politike gjatë fushatave dhe që bëjnë të detyrueshëm një audit serioz ndërkombëtar të të gjitha financimeve që përdorin aktualisht partitë politike.

Në fund, Hafizi ka sqaruar edhe aktivitetin e LIBRA në fund të vitit në një nga hotelet në Tiranë, për të cilin u akuzua nga mediat se kishin shpenzuar një shumë kolosale.

Postimi i Mimoza Hafizit

Ka një kuriozitet të arsyeshëm, që e mirëkuptojmë, rreth financimit të LIBRAs.

LIBRA është organizatë politike e ngritur mbi parimin e vetëfinancimit përmes kuotave të anëtarësisë si dhe nga burime të tjera të ligjshme. Në fund të dhjetorit kemi miratuar një skemë kuote progresive, sipas të ardhurave të gjithësecilit. Kjo kuotë është 1% e pagës. Studentët, pensionistët e sigurisht të papunët, nuk do të kuotizojnë tek LIBRA.

Në dy muajt e parë të saj, LIBRA ka mbuluar mbi 70% të aktivitetit nga kuotat e anëtarësisë, kurse pjesa tjetër është mbuluar nga sponsorizime po nga anëtarët e saj, të cilat çdoherë kanë qenë shumë më poshtë se vlera tavan e përcaktuar nga ligji. Shpenzimet e LIBRAs janë qiraja, dritat, uji, interneti e sallat e takimeve.

Së shpejti LIBRA do të ketë numrin e saj të llogarisë bankare, ku çdokush është i mirëpritur të dhurojë shuma edhe minimale, përkundrejt transparencës maksimale të çdo leku të shpenzuar. Aktivistët LIBRA po kërkojnë të ngrejnë zyra kudo në Shqipëri, të cilat do të jenë vendet e takimit të anëtarëve dhe miqve LIBRA.

Ne jemi organizatë e krijuar si e mirë publike, në shërbim të demokracisë dhe politikës në Shqipëri, dhe e konsiderojmë të arsyeshme dhe të pranueshme kontributin e çdo qytetari për funksionimin tonë normal.

LIBRA i qëndron parimit të modestisë dhe modernitetit, dy parime që do na bëjnë organizatën më të pakushtueshme politike në vend.

Ne, dy deputetët LIBRA, do nisim së shpejti kërkesën për ndryshime ligjore që kufizojnë financimet e partive politike gjatë fushatave dhe që bëjnë të detyrueshëm një audit serioz ndërkombëtar të të gjitha financimeve që përdorin aktualisht partitë politike.

Sa për sqarim, me datën 29 Dhjetor, LIBRA organizoi në Tiranë një takim të 400 anëtarëve të saj më aktivë në të gjithë vendin. Kemi kërkuar disa salla, salla e parë, në periferi të Tiranës, na u dha me çmimin surprizë të 90 mijë lekëve (të reja) dhe e anuluam thuajse në çastin e fundit. Një sallë në qendër të Tiranës, me kapacitet 600 vende, mund të merrej vetëm me 80 mijë lekë, kurse një tjetër po në qendër, në një hotel të njohur, me 200 vende të pamjaftueshme për ne, na u ofrua me 360 euro. Salla ku zhvilluam aktivitetin, për fat kishte numrin e duhur të vendeve dhe na u dha me çmimin 50 euro. Kjo është e vërteta e qirasë së sallës së aktivitetit të datës 29 Dhjetor, në të cilën patëm kënaqësinë të ofrojmë dhe një kokteil modest për të gjithë aktivistët tanë nga e gjithë Shqipëria, dhe që u vetëfinancua.





Lajmet e fundit nga