E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Reforma në drejtësi: Krerët e vjetër, jashtë KLGJ

10 Shtator 2016, 12:11, Aktualitet CNA

Reforma në drejtësi me kalimin e 6 ligjeve në Kuvend më 22 shtator, me anë të kritereve të vëna në ligjin për gjyqësorin përcakton se nuk mund të jenë drejtuesit e sotëm të gjykatave, prokurorive apo shoqatave a sindikatave të drejtësisë në organet e gjyqësorit. Në nenin 7 të ligjit janë përcaktuar kriteret dhe kushtet, duke përjashtuar në këtë mënyrë shumë emra të njohur të gjyqësorit shqiptar. Pra kreu i Gjykatës së Lartë, Xezair Zaganjori; ai i Gjykatës Kushtetuese, Bashkim Dedja; i Gjykatës së Tiranës, Fari Islamaj; i Gjykatës së Tiranës së Apelit, Hysni Demiraj; i Gjykatës së Krimeve të Rënda, Sandër Simoni, apo dhe krerët e prokurorive nga Adriatik Llalla te kreu i prokurorisë së Tiranës, Petrit Fusha, nuk kanë të drejtë të garojnë për të qenë pjesë e Këshillit të Lartë Gjyqësor dhe Këshillit të Lartë të Prokurorisë. SHBA dhe BE prej kohësh kanë ngritur akuza se sistemi gjyqësor në vend nuk funksionon si duhet.

Neni 7 i ligjit për organet e qeverisjes gjyqësore përcakton detajet dhe kriteret mbi përzgjedhjen e anëtarëve të Këshillit të Lartë Gjyqësor. Në të thuhet se mbledhja e përgjithshme e gjyqtarëve të të gjitha shkallëve zgjedh 6 anëtarë të Këshillit të Lartë Gjyqësor sipas raportit: tre prej të zgjedhurve janë gjyqtarë të shkallës së parë. Së paku, 1 prej tyre është gjyqtar në një gjykatë të shkallës së parë jashtë Tiranës; dy prej të zgjedhurve janë gjyqtarë të Apelit. Së paku, 1 prej tyre është gjyqtar në një gjykatë të Apelit jashtë Tiranës dhe një prej të zgjedhurve është gjyqtar në Gjykatën e Lartë.

Sipas ligjit, kriteret që duhet të plotësohen janë këto: Në kohën e kandidimit, të kenë ushtruar funksionin e gjyqtarit për të paktën 10 vjet; në kohën e kandidimit, nuk duhet të jenë kryetarë të një gjykate ose anëtarë të organeve drejtuese të grupeve të interesit të tilla si shoqata gjyqtarësh, sindikata gjyqtarësh etj. /Citynews.al