web counter
LEXO PA REKLAMA!

SHKARKO APP

App Store
Google Play

E fundit!

x

Përplasja me Kokëdhimën/ A e kontrollon Edi Rama PS në Jugun e Shqipërisë?

2 Gusht 2016, 07:30, Aktualitet CNA

Tashmë nuk ka asnjë dyshim që përplasja mes Kryeministrit Edi Rama dhe ish-deputetit socialist Koço Kokëdhima nuk ka kthim pas dhe dy politikanët, dikur miq dhe mbështetës, sot ndoshta mund të jenë kundërshtarët më të fortë për njëri tjetrin.

Por cili ka dalë i humbur nga kjo përplasje mes dy kryesuesve të listës elektorale për Qarkun e Vlorës në zgjedhjet e fundit parlamentare?

Edi Rama mandatoi Koço Kokëdhimën si përfaqësuesin më të lartë në pothuajse të gjithë Jugun e vendit. Aq mandate kishte Kokëdhima në rajonin Vlorë-Gjirokastër sa ai nisi të quhej Kryeministri i Jugut, për vetë faktin se në opinion ishte krijuar idea se asnjë gjë nuk mund të lëvizte pa lejen e ish-deputetit socialist.

I gjithë ky pushtet dhe besim në duart e Kokëdhimës dhe pa një kontroll çoi disa herë në përplasje mes ish-deputetit dhe kolegëve të tjerë, të cilët ishin përfaqësues të të njëjtave qarqe, Vlorës dhe Gjirokastrës.

Por mbështetja që Kokëdhima kishte nga Rama ishte absolute, aq sa atij iu besua të eksperimentojë me organizimin e strukturave të Partisë Socialiste, edhe pse kundërshtitë këtë rradhë nuk ishin vetëm nga deputetët socialist të këtyre rajoneve, por edhe nga Gramoz Ruçi, njohësi më i mirë i strukturave dhe organizimit të Partisë Socialiste.

Gjithsesi Kokëdhima nuk u ndal, teksa në të gjitha strukturat e PS-së arriti të linte në hije disa nga figurat lokale, duke u përqëndruar në emra të tjerë, ofrimin e të rinjve. Pra Kokëdhima, arriti të krijonte një piramidë të tijën jo vetëm strukturave të PS-së, por edhe në emërimet shtetërore në rajonin Vlorë-Gjirokastër, ku ai ishte deputeti i plotëfuqishëm.

Nisur nga këto, Edi Rama duket se do e ketë të vështirë me strukturat e PS-së, kjo për faktin se deri para përplasjes me Kokëdhimën, çdo lëvizje e kryer është bërë edhe me miratimin e tij, qoftë edhe duke heshtur.

Megjithëse për të mbuluar Vlorën dhe Gjirokastrën, Rama si kryetar i PS-së, ka mandatuar dy ministra, duket se e ka të vështirë të punojë në një terren të qetë, i cili mund të minohet nga momenti në moment nga ish-miku i tij, Kokëdhima. Rama i ka besur Kokëdhimës edhe kur ai kishte përplasje me Kryebashkiakun e Vlorës Dritan Leli, edhe kur kishte përplasjet me deputetët e tjerë të PS në Vlorë-Gjirokastër, apo edhe kur mbështeti një kandidat jashtë koalicionit të ASHE në zgjedhjet e fundit vendore.

Ndoshta ish-deputeti ka bërë llogaritë që me një largim nga Rama dhe ofrim pranë LSI-së, edhe strukturat e tij në Vlorë-Gjirokastër do të bëjnë të njëjtën lëvizje, duke spostuar potencialet dhe burimet njerëzore nga një forcë politike në tjetrën, çka do të ishte një goditje për socialistët.

Si Vlora dhe Gjirokastra janë konsideruar hambarë votash për Partinë Socialiste, qoftë në 2013 ashtu edhe në 2015, ndërsa një pjesë e tyre mund të trafikohet drejt LSI-së, pikërisht për shkak të kontrollit të strukturave nga Kokëdhima.

Por gjithçka do të shihet nga rezultati i gjedhjeve të ardhshme parlamentare në Qarqet Vlorë-Gjirokastër, ku realisht do të duket pesha politike e ish-deputetit Kokëdhima dhe nëse Rama ka fituar apo ka humbur nga përplasja me të. /citynews/

 





Lajmet e fundit nga