Lindita Nikolla krijon konfuzion për pranimet në universitet/ Ja të gjitha paqartësitë dhe shkeljet e MAS

29 Korrik 2016, 06:35, Aktualitet CNA

Maturantët që kërkojnë të kalojnë në stadin universitar të studimeve janë të painformuar se si do të ndiqet ky proces. Ndërsa deri tani duhet të kishin mbyllur procesin, një gjë e tillë nuk ndodh dhe procesi duket se është vetëm në fazën fillestare. Maturantët ende nuk e kanë marrë dëftesën e 3 viteve studime në gjimnaze dhe as diplomën e përfundimit të arsimit të mesëm, bashkë me notat e maturës. I vetmi udhëzim i publikuar nga Ministria e Arsimit është pagesa që maturantët duhet të paguajnë për të çuar notën mesatare tek Agjencia Kombëtare e Provimeve, shkruan “Sot”

Ndërkohë, nxënësit janë të paqartë si do të përllogaritet mesatarja e tyre, si do të bëjnë aplikimin për të kaluar në universitet, cila do të jetë dega që ata kanë mundësi të arrijnë, dhe nëse humbasin degën e parë, si do të vijojnë me preferencat e tjera, pranë cilave organe do të drejtohen maturantët që të marrin një informacion. Të gjitha këto janë të paqarta. Ministria e Arsimit nuk ka dhënë informacion për procedurat, ndërsa përplaset edhe me universitetet. Ndërkaq, duket se vetë Ministria e Arsimit po krijon një kakofoni edhe për shkak se në disa raste vepron në bazë të ligjit të vjetër dhe në disa raste të tjera në bazë të ligjit të ri për arsimin. Ngërçin e ka sqaruar kreu i Departamentit për Arsimin në PD, Luçiano Boçi.

Ndërsa Ministria e Arsimit ka udhëzuar shkollat që të dërgojnë në mënyrë elektronike të dhënat për përllogaritjen e mesatares, ende formula si do të bëhet nuk është e qartë. Këto të dhëna i dërgohen APK kundrejt një pagese prej 20 mijë lekësh të vjetra. Në këtë pikë, Boçi thotë se këtë proces, sipas ligjit nuk duhet ta kryejë AKP, por Agjenci të Shërbimeve Arsimore. ?Ligji i ri i arsimit të lartë që ka strukturën institucionale të Ministrisë së Arsimit nuk parashikon APK, parashikon që të ketë Agjenci të Shërbimeve Arsimore. Pra, ishte ASHA që zëvendëson AKP dhe merrte edhe atribute të tjera. Jemi në shkelje të plotë të ligjit. Jemi në një situatë ku ka boshllëk ligjor, nuk ka një institucion ligjor që merret me menaxhimin e fazave të aplikimit dhe të regjistrimi të studentëve para se të futet në lojë universiteti.

Ka një konflikt shumë të madh nga ana ligjore?, thotë Boçi. Ndërkaq, udhëzimin për hapjen e procedurave ai e quan të nxitur pasi studentët ende nuk kanë dëftesën e 3 viteve studime dhe diplomën që merret në përfundim të maturës. ?Udhëzimi është shumë i nxituar. E para është mosjustifikimi i pagesës prej dy mijë lekësh të reja, 20 mijë të vjetra që studentit t?i hapet procedura e dërgimit të mesatares tek AKP. Nuk kuptohet pse një maturant duhet të paguajë këtë tarifë. Kjo tarifë është e paregjistruar, kjo thjeshtë shtynë gjimnazin apo shkollën që të dhënat e studentit t?i dorëzojë në mënyrë elektronike tek portali i AKP. Këtu është e paqartë këto të dhëna do i menaxhojë AKP apo Ministria?, shpjegon Boçi.