E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Edi Rama deklaroi 71 vota për Qeverinë/ Kush janë renegatët?

25 Korrik 2016, 11:30, Aktualitet CNA

Pas miratimit të Kushtetutës së re në Kuvend me votat e 140 deputetëve, çështja më e rëndësishme politike, e cila mbetet për tu zgjidhur me nisjen e sesionit të ri parlamentar është ajo e Qeverisë.

Kryeministri Edi Rama përgjatë javëve të fundit ka bërë çdo përpjekje për të çuar vendin në zgjedhje të parakohshme, duke iu referuar nenit 104 të Kushtetutës, ku përmes një votëbesimi në Kuvend 71 deputetë do të votojnë kundër Qeverisë së tij, por këto vota duhet të jenë të sigurta për faktin që të mos votojnë pro një Kryeministri të ri, referuar nenit 105 të Kushtetutës.

Edi Rama ka deklaruar se i ka të sigurta 71 votat, në një kohë kur Grupi Parlamentar i PS-së, numëron 63 deputetë, ku përfshihen edhe Ben Blushi, Mira Shehu dhe Mimoza Hafizi, të cilët pavarësisht divergjencave që mund të kenë me Ramën nuk do të votojnë për skenarin e një Qeverie teknike, ku PD-LSI do të përbënin mazhorancën e re në Parlament.

Pra në këtë rast ato e kanë më mirë të hyjnë në negociata me Ramën, se të votojnë kundër PS-së. Në dyshim mbetet qëndrimi i Mira Shehut, deputetes e cila është shumë ranë qëndrimit të Koço Kokëdhimës. Pra numri i votave që Rama mund të ketë në dispozicion, përfshi këtu edhe kritikët brenda PS llogaritet në 62..

Në kushte të tilla, Kryeministrit i duhen edhe minimalisht 9-11 vota, të cilat duhet ti sigurojë ose nga partitë e opozitës, ose nga LSI dhe PDIU-ja.

Nëse kjo e fundit do të mbështesë opsionin Rama, pra për një qeveri pa LSI-në ose zgjedhjet e parakohshme pa një Qeveri teknike, atëherë numri i deputetëve që Rama ka në Kuvend në rastin më të mirë është 67, që do të thotë se Kryeministrit aktual do t?i duhen edhe 4 vota të tjera.

Gjatë javëve të fundit, në kohën kur vëmendja ishte përqëndruar tek miratimi i Reformës në Drejtësi, Kryeministri u pa i angazhuar në takime me strukturat partake, kryetarët e degëve të PS-së në rrethe, por edhe me deputetë të veçantë, me të cilët kishte marrëdhënie të ngrira, ose i përkasin partive jashtë koalicionit. Duke qenë se çështja kryesore ishte ajo e reformës, mendohej se takimet e Ramës bëheshin thjesht për të siguruar votat, në një kohë kur ai po përgatitet për skenarin e një Qeverie pa LSI-në ose drejt vajtjes në zgjedhje të parakohshme pa një Qeveri teknike.

Burime nga Partia Socialiste shprehen të sigurtë se 2 ose 3 deputetë, që i përkasin LSI-së, por që rrezikojnë të jenë në listat për deputetë të kësaj partie në zgjedhjet e ardhshme, me një pakt për t?u përfshirë në listat e PS-së mund të mbështesin lëvizjen e Ramës. Kjo do të thotë se numri i ligjvënësve shkon në 69-70.

Gjithashtu, besohet se minimalisht 3-4 deputetë nga opozita mund të mbështesin një opsion të tillë, pra duke i dhënë mundësinë Ramës të çojë vendin në zgjedhje të parakohshme, ose të ndërtojë një Qeveri të re pa LSI-në.

Edhe në këtë drejtim, mësohet se vëmendja është përqëndruar tek ata ligjvënës të cilët me shumë gjasa nuk do të përfshihen në listat për deputetë në zgjedhjet e ardhshme parlamentare. Pra me pak fjalë, lëvizjet e Ramës duket se janë drejt sigurimit të votave të deputetëve të cilët nuk kanë një të ardhme politike në subjektet ku ata bëjnë pjesë aktualisht, kjo qoftë për shkak të përplasjeve që mund të kenë me drejtuesit e partive, qoftë edhe për shkak të pasivitetit të tyre në debate apo angazhime politike.

Nëse ndodh ky opsion, atëherë do të kemi sërisht një Qeveri që ose mbahet në këmbë me vota të trafikuara, ose vendi shkon drejt zgjedhjeve të parakohshme, po përmes votave të trafikuara. /citynews/