E fundit!

21:48 Aktualitet

Tubimi i 28-të kundër qeverisë/ Protestuesit nisin marshimin në rrugët e Tiranës

Protestuesit janë larguar nga Kryeministria dhe kanë nisur...

Nga Andi Bushati/ Pse Rama hezitoi të përmendë Metën?

18 Korrik 2016, 18:15, Aktualitet CNA

Në të parën dalje të gjatë publike që pas kërcënimit me rrëzimin e qeverisë, që i bëri dje Ilir Meta, Edi Rama tregoi dy gjëra.

Së pari ai dëshmoi se ndjehet i trembur nga shantazhi i partnerit të tij të koalicionit. Ndërsa të gjithë shqipëtarët prisinin me padurim se si do ti përgjigjej ai propozimeve të djeshme të arikuluara në selinë e kuvendit, Rama bëri sikur ato nuk ekzistonin. Ai nxori paraditen e së hënës dy – tre nga njerëzit e tij të skalionit të dytë, por vetë nuk pati, as argumentat dhe as guximin ti jepte një përgjigje Ilir Metës.

Konkluzioni i dytë që mund të nxirret nga fjala e tij është se pavarësisht nga heshtja, Edi Rama po përgatitet për përballjen me vëllain e tij armik. Megjithëse nuk foli asnjë fjalë, ai e di se rreziku i prishjes së koalicionit, i rrëzimit të qeverisë dhe i zgjedhjeve të parakohëshme është i madh. Pikërisht për këtë ai ka nisur emisarët e tij që të rekrutojnë deputetët që do ti mbajnë në këmbë shumicën parlamentare.

Pikërisht për këtë, ai po përgatit edhe tezat politike të një përbaljeje të afërt.

Ndjekja me kujdes e fjalimit të tij, para sudentëve, përbënte embrionin e parë të fushatës propagandistike që po përgatitët për pas 23 korrikut. Ai po mëton ta shndërrojë dështimin e reformës në një armë për luftën e ardhshme.

Në fjalët e tij ndihej qartë ideja se ai qe me perendimin dhe kundërshtarët e vet kundër ShBA-së dhe BE. Se ai qe me ata që nuk janë angazhuar kurrë kaq fort me Shqipërinë që pas sjelljes së operacionit Alba në 1997. Se ai qe në të njëtën linjë më mesazhet që kanë ardhur nga Shtëpia e Bardhë, kancelaria gjermane apo presidenca franceze.

Mjafton që ta shikoje në këtë këndvështrim për të kuptuar se Rama po rreket të përvijojë një vijë të re ndarëse në politikën shqiptare: Ai dhe të tijët që janë pro perendimorë dhe të tjerët, Berisha, Meta dhe Basha që janë kundër tyre.

Megjithëse ai nuk e përmendi asnjëherë as vëllain e tij armik dhe as propozimin e tij, fjalimi i kësaj të hëne qe shenja e qartë se ai po përgatitet për luftë. Për një betejë jo vetëm me numra, por edhe me teza politike.

Natyrisht është çështje tjetër se sa do ta besojnë shqipëtarët fabulën e Ramës perendimor, që po ja dhurojnë në mënyrë të pamerituar, PD dhe LSI. Eshtë çështje tjetër se sa ky imazh mund të përputhet me korrupsionin galopant, lidhjet me krimin, blerjen e mediave dhe autoritarizmin e tij në rritje. Kjo mbetet për tu parë.

Por nëse do të ketë betejë politike dhe zgjedhje, Rama tregoi se do të mundehet ti manipulojë ato. Ai nuk do një debat real për ekonominë, punësimin, investimet e huaja dhe largimin e trurit, por një plebishit mes atyre që janë properëndimorë dhe atyre që janë kundër tij. Kjo është edhe përgjigjja e tij e vetme për Metën./lapsi