Takimi me Metën dhe Ramën/ Basha: Vijojnë negociatat për propozimin hibdrid

18 Korrik 2016, 16:10, Aktualitet CNA

Ka përfunduar takimi mes Kryetarit të LSI-së Ilir Meta, Kreut të PD-së Lulzim Basha dhe Kryeministrit Edi Rama, zhvilluar në Kryesinë e Kuvendit.

Kreu i opozitës, në një prononcim për mediat pas përfundimit të takimit është shprehur se tre palët politike kanë përcaktuar nga një negociator, të cilët do të vijojnë diskutimet bazuar në propozimin hibrid të paraqitur nga Zv.Sekretarja Amerikane Victoria Nuland.

Basha tha se përfaqësuesi i PD-së, i cili do të ketë plotfuqinë për negociatat në vijim, do të jetë Oerd Bylykbashi.

Kreu i PD-së e konsideroi konstruktiv takimin e sotëm, ndërsa tha se kjo është një mundësi për palët politike për të përmbyllur me sukses Reformën në Drejtësi.

Basha tha se negociatat do të bazohen në propozimin hibrid dhe rekomandimet finale të Komisionit të Venecias.

“Si kryetari i PD dhe kryetari i opozitës e vlerësoj këtë takim si konstruktiv. Në fund të takimit tre forcat politike, tre kryetarët e forcave politike kanë angazhuar secili nga një përfaqësues të tyrin për të kërkuar zgjidhje bazuar mbi propozimin hibrid dhe rekomandimet finale të komisionit të Venecias.

Për ne kjo është një mundësi për të përmbyllur me sukses maratonën e reformës në drejtësi, për të përmbyllur në vecanti draftin kushtetues. Natyrisht pas kësaj janë edhe 7 ligjet. Ndaj siç e kam thënë vazhdimisht negociatori ynë Oerd Bylykbashi ka plotfuqinë për të negociuar një zgjidhje bazuar mbi propozimin hibrid dhe rekomandimit e Komisionit të Venecias.

Ne kemi paraqitur një zgjidhje dhe kontributi ynë për ta sjellë propozimin hibrid tërësisht brenda parametrave të Venecias është dëshmia më e qartë e seriozitetit, përkushtimit dhe sinqeritetit të PD, që e ka parë dhe e sheh reformën si një interes të qytetarëve shqitpare dhe jo si një kalkulim politik apo një betejë paraelektorale. Kështu e kemi nisur dhe kështu do të vazhdojmë këtë process. Uroj që negociatorët që sapo janë mandatuar do të bëjnë një punë të mirë dhe do ta cojnë në konkluzion pozitiv këtë proces për ti dhënë shqiptarëve dhe aleatëve lajmin e mirë.” tha Basha për mediat.