Skenarët për Qeverinë teknike/Ja kandidatët e mundshëm për postin e Kryeministrit?

18 Korrik 2016, 13:18, Aktualitet CNA

Nëse Kuvendi i Shqipërisë do të vendosë për votimin e një Qeverie teknike, bazuar në nenin 105 të Kushtetutës, e cila do të çonte vendin drejt zgjedhjeve të parakohshme, atëherë mazhoranca e re e krijuar, duhet të paraqesë në Parlament kandidatin për Kryeministër.

?Një e pesta e deputetëve ka të drejtë të paraqesë për votim në Kuvend një mocion mosbesimi ndaj Kryeministrit në detyrë, duke propozuar një Kryeministër të ri. Kuvendi mund të votojë një mocion mosbesimi ndaj Kryeministrit vetëm duke zgjedhur me votat e më shumë se gjysmës së të gjithë anëtarëve të tij një Kryeministër të ri. Presidenti i Republikës dekreton shkarkimin e Kryeministrit në detyrë dhe emërimin e Kryeministrit të zgjedhur jo më vonë se 10 ditë nga votimi i mocionit në Kuvend?.

Ky është përcaktimi që i bën Kushtetuta në nenin 105 të saj krijimit të një qeverie të re, e cila referuar përllogaritjeve të votave nga Citynews, duhet të ketë mbështetjen jo vetëm të deputetëve të PD-LSI, por edhe të të pakënaqurve nga Edi Rama.

Në kushte të tilla do të jetë e vështirë të gjendet një konsensus për emrin e Kryeministrit të ardhshëm të Qeverisë teknike, gjithmonë nëse kjo do të realizohet.

Nga burimet mësohet se grupi i deputetëve socialistë të pakënaqur apo kontestues të Edi Ramës nuk do të mbështesin asnjë qeveri e cila nuk do të ketë në krye të saj një socialist, pra një përfaqësues të vjetër në rradhët e socialistëve, dhe jo një Rilindas. Referuar kësaj teze, burimet sqarojnë se janë dy kandidatura, Arta Dade dhe Mimoza Hafizi.

Por duket se ky propozim mund të hasë në kundërshtitë e demokratëve të drejtuar nga Lulzim Basha, të cilët mund të kenë të vështirë të votojnë një emër nga rradhët e deputetëve të PS-së, qoftë edhe kundërshtarë të Edi Ramës.

Në anën tjetër, LSI duket se po teston emrin e Halim Kosovës, kandidat i PD-së për zgjedhjet në Bashkinë e Tiranës, i cili prej 2015, pas humbjes së garës përballë Erjon Veliajt, është tërhequr nga politika active. Burimet theksojnë se propozimi për Kosovën ka dalë nga rradhët e LSI dhe duket se është mirëpritur nga demokratët. Por fakti është që Kosova mund të marrë votat e disa deputetëve nga rradhët e PS-së, të cilët përballë emrave të tyre, Dade dhe Hafizi, nuk mund të votojnë pro një kandidati të hedhur në tryezë nga LSI dhe që mund të ketë mbështetjen e PD-së.

Ky ndoshta mund të jetë ngërçi që mund të krijohet në Kuvend, nëse realizohet ky skenar mbi krijimin e qeverisë teknike, ndërsa skenari tjetër që mbetet në lojë është ai sipas nenit 104 të Kushtetutës, ku me rrëzimin e Qeverisë Rama vendi kalon në zgjedhje të parakohshme, pa lënë mundësinë e një qeverie teknike.

Këto janë emrat që qarkullojnë për të pasur një mazhorancë politike, por nëse biet dakort për një qeveri vetëm me teknicienë, atëherë pritet të ketë emra të tjerë në lojë.

/ Citynews/