Skenarët për zgjedhje dhe riformatimin e Qeverisë

12 Korrik 2016, 13:30, Aktualitet CNA

Reduktimi i votave në Grupin Parlamentar socialist dhe përplasja që Kryeministri Edi Rama tashmë ka me Kryetarin e Kuvendit, Ilir Meta, mund të krijojnë një krizë qeverisjeje, çka mund të çojë në zgjedhje të parakohshme, apo në një Qeveri tjetër të formatuar tërësisht.

Në kushtet aktuale kur Edi Rama ka vetëm 54 deputetë, mes të cilëve mund të ketë edhe largime të tjera, votat që e mbajnë në qeverisje janë ato të PDIU-së dhe LSI-së. Nëse kjo e fundit ndërmerr hapin final, praktikisht qeveria është e rrëzuar, pasi megjithë votat e PDIU-së Rama nuk arrin të bëjë as 60 deputetë pro tij, në rastin më të mirë të mundshëm.

Por cilët janë skenarët që mund të aplikohen pas 21 Korrikut, datë kur do të votohet në Kuvend reforma në drejtësi.

Nëse reforma nuk miratohet, përmes një mocioni mosbesimi Qeveria Rama me votat aktuale që ka është e rrëzuar, nëse LSI do të votojë kundër. Atëherë mund të krijohet ose një qeveri sipas kushteve që Meta do t?I përcaktojë Ramës, ose krijohet një qeveri teknike që çon vendin drejt zgjedhjeve të parakohshme.

Në rastin e miratimit të reformës në drejtësi, skenari që mund të ndodhë është ai i mocionit ndaj Qeverisë Rama, rrëzimin e saj, por krijimin e një qeverie po brenda të majtës, ku Ilir Meta mund t?i imponohet kreut socialist për çdo post ministror, madje t?I kërkojë edhe atë të Kryeministrit.

I vetmi shans që Rama ka për të shpëtuar mocionin është që paraprakisht të bjerë dakort me Ilir Metën për ndryshimet në Qeveri, duke pranuar çdo kërkesë të aleatit të tij për largim ministrash, dhe dhënien e më shumë posteve qeveritare. Në takimet e zhvilluara mes tyre, Meta i ka kërkuar Ramës riformatimin e qeverisë duke mos përfshirë në kabinetin e ri, Sajmir Tahirin dhe Edmond Haxhinaston. Por me kushtet në të cilat sot ndodhet Rama, kërkesat mund të shtohen dhe LSI mund të kërkojë edhe largimin e Ilir Beqajt apo Damian Gjiknurit. /citynews/