Kurt Kola dhe Elsa Ballauri: PS-PD po bllokojnë hapjen e dosjeve për të mbrojtur spiunët e tyre

1 Qershor 2016, 08:58, Aktualitet CNA

Kurt Kola, i përndjekur politik gjatë periudhës së komunizmit dhe Elsa Ballauri, kryetarja e Grupit për të Drejtat e Njeriut, mendojnë se Partia Demokratike edhe ajo Socialiste po e bllokojnë qëllimisht procesin e hapjes së dosjeve të Sigurimit të Shtetit, pasi synimi i tyre është që të mbrojnë spiunët në postet kyçe në institucionet më të larta në vend.

Është bërë fiks një vit që kur u miratua ligji për zbulimin e spiunëve dhe deri më sot nuk ka ndodhur një gjë e tillë. Kuvendi vijon të mbajë të bllokuar zgjedhjen e 5 anëtarëve të Autoritetit të Dosjeve. Por sipas Kolës dhe Ballaurit, ligji në fjalë nuk e zgjidh një herë e mirë këtë çështje dhe është krijuar në mënyrë të tillë që nga ai të mos preken disa nga personat e implikuar, tashmë të veshur me pushtet.

Gazeta “Sot” shkruan se për Kurt Kolën, zvarritja e këtij procesi nga politika tregon qartësisht se kjo çështje nuk do të zgjidhet ndonjëherë dhe se pjesa e më e madhe e nismave janë marrë, për efekte kryesisht elektorale. Sipas tij, dihet botërisht se sigurimsat ndodhen në institucionet më të rëndësishme të vendit, ministri dhe deri tek niveli i drejtorive. ?Nuk kanë dëshirë, nuk duan politikanët t?i hapin dosjet e tyre. Për sa kohë nuk u aprovua edhe ligji i Lustracionit, të hiqen ata që kanë bërë krime gjatë kohës së komunizmit, nuk e duan hapjen e dosjeve. Pse ata nuk dua t?i hapin dosjet? Sepse do të dalin shumë të palara, do të dalin shumë gjëra të fshehura. Spiunët, bashkëpunëtorët e Sigurimit të Shtetit funksionojnë në këto 25 vjet që nga sfera më e lartë e shtetit duke zënë pozicionet më kyçe. Nuk dua të përmend institucione konkrete, por është e qartë që ata ndodhen në postet më të larta si tek ministritë ashtu edhe tek drejtoritë?, ka deklaruar Kurt Kola.

ër Kryetaren e Grupit të të Drejtave të Njeriut, Elsa Ballauri, partitë politike nuk e kishin seriozisht hapjen e dosjeve që në momentin që miratuan ligjin. Sipas saj, ligji është shumë i paplotë dhe i paqartë, madje edhe nëse do të zbatohej ai nuk do ta zgjidhte këtë çështje. Ajo ka thënë se ky proces u bë thjesht për imazh, por pa hapur si duhet dosjet e ish-Sigurimit dhe për të shpëtuar politikbërësit. Sipas saj, ky proces duhej që patjetër të shoqërohet me lustracion, pasi shqiptarët nuk do të njihen realisht me të shkuarën e errët të sistemit komunist. Elsa Ballauri ka theksuar gjithashtu se ligji linte shumë hapësira për keqpërdorim nga titullarët e institucioneve.

?Është e qartë se në këtë proces ka pasur një neglizhencë nga partitë politike, dhe kjo u pa që në momentin që u miratua ligji, që ishte shumë i paqartë dhe nuk e zgjidhte këtë çështje. Ka kaluar një vit nga hyrja e tij në fuqi dhe ende nuk është vënë në zbatim dhe përgjegjësia normalisht që është politike?, ka deklaruar Ballauri.