Shënim/Opozita e opozitës?!

30 Maj 2016, 16:58, Aktualitet CNA

Ka disa kohë që eksponentë të PD-së, pas çdo kritike që ju drejtohet, artikulojnë se ekziston opozita e opozitës. Një artikulim që e përdorin për këto që kundërshton, thotë një mendim, një kritikë, nuk është dakord me një veprim apo thotë të vërtetat drejtuar PD-së. E përdorin për mediat, por edhe për persona që kanë kurajo t?i thonë publikisht shumë gjëra, të cilat disa palaço oborri i ndoshta i dinë mjaft mire, por heshtin. Një heshtje që në fakt po e vret partinë më të madhe të opozitës në vend.

Opozita e opozitës nuk mund të jetë e vërteta, ajo është thjesht dhe vetëm aleatja më e madhe e saj. Këtë duhet të përqafojë menjëherë Lulzim Basha, dhe ky do ishte shpëtimi i tij politik dhe partisë që drejton.

Për të sjellë disa detaje, në lidhje me të vërtetat dhe opozitën e opozitës, që e quajnë disa kllouna të pavlerë dhe imoralë, të cilët duhet të heshtin e jot ë bëjnë moral. Kursesi nuk mund të pranojnë shqiptarët moral nga imoraliteti.

Është opozitë e opozitës apo e vërtetë që PD-ja humbi zgjedhjet lokale? Që u bë një analizë e përciptë, që ndërhyrja erdhi me vonëse, dhe më keq akoma me një udhëzim antistatutor po përçan më tej PD-në. Këto nuk janë opozitë por të vërteta që kërkojnë respektim rregullash dhe parimesh.

Nuk është opozitë e opozitës, të bërtasësh, kujdes se janë zgjedhjet fallco në shumicën e degëve, dhe kryesitë po emërohen nuk po zgjidhen. Sekretari organizativ i PD-së Enno Bozdo i dalë vetëm 6 muaj më parë në opozitë, pas 10 vitësh të gjata pushteti u kap duke falsifikuar dhe urdhëruar manipulime në zgjedhje kryesish. Shumë seksionë nuk ekzistojnë dhe ishin fiktive. Kjo su pranua por zgjedhjet lokale më pas treguan të vërtetën. Kjo nuk është opozitë e opozitës, por është ti thuash PD-së që ka nevojë për burra me 2 R jo me dy N. Nuk ecet me manipulime dhe falsifikime. Kur nuk respekton votën brenda partisë mos prit ta respektojë kundërshtari.

Nuk është opozitë e opozitës t?i thuash Bashës publikisht se PD-në në Korcë ta ka kapur Niko Peleshi, në Sarandë Koço Kokëdhima, në Shkodër 2 prilli ishte sinjali i alarmit. Degët e Tiranës përjashto ndonjë tek tuk, janë në gjendje skandaloze. Në Fier ke 4 klanë që po përleshen, në Vlorë po ashtu, në Sarandë, Gjirokastër, Korcë, Shkodër, Elbasan, Dibër, kudo përçarje që po thellohet nga një analize sipërfaqësore dhe një ndërhyrje me vonesë dhe pa rregulla për të korrigjuar gabimet e djeshme.

Nuk është opozitë e opozitës ti thuash Lulzim Bashës, e ke mbushur oborrin me burra si gra dhe gra që bëjnë burrin. Po kush mund të bësojë e ndjekë nga pas një grup prej 15 vetësh, ish zv/ministra, deputëtë, drejtorë apo ndonjë ish-ministër që fshihet pas Bashës, që janë biznesmenë dhe dhe 7 burime financiare, që janë milionerë, që janë ata që dëbonin dje militant? Kush mund të ndjekë, nga pas Bozdot, Pollot, Kadillët, Spahot, Gridrat, Salianjët e co. Po kush i beson këta ndryshqe që dje ishin pjesë e qeverisë dhe përgjegjës po sa ish-ministrat?! Kush i beson këta që sot bëjnë një ?betejë? të largojnë 10 ish-ministra. Por problem nuk është këtu, problem qëndron tek fakti që ata nuk e bëjnë për moral politik dhe ecje të PD-së përpara, por që të rrëmbejnë ca karrige nesër dhe të ndërtojne rrugën e tyre si ministra pasnesër. Po kush e beson PD-në me këta karrigethyer dhe ndryshqe të niveleve të dyta të pushtetit. Po pse me keta do ecë përpara PD? Kjo është e vërtetë dhe jo opozitë e opozitës.

Ata që shohin ëndra me opozitë e opozitës janë nja 15 qafira që duan karrigë, karrierë e pushtet, por Basha duhet ti shohë dhe të bëjë ristrukturime dhe ndërhyrje në drejtuesit e PD-së. Të çojë në krye vërtet figura të pastra dhe më kontribute, jo nga ata ndryshqe në nivelet e dyta të pushtetit që dje vidhnin si cakej e sot përgjërohen për ndershmëri. Është kjo kastë që po bën gjithçka ta turbullojë sa më shumë, thjesht dhe vetëm që kur të pastrohet të jetë në shërbim të tyre. Kjo nuk është opozita e opozitës, kjo është ti vesh gishtin në plagë dhe të kërkosh mjekimin e duhur për shërim. Infeksionet duan antibiotikë, jo ilace të skadura. E vërteta është shërimi, servilizmi dhe gjendja aktuale janë vdekja klinike./citynews