Protesta e Veliajt për pallatin te diga/ Nishani: Gjyqtarët të mbrojnë Republikën

12 Maj 2016, 16:37, Aktualitet CNA

Kreu i Shetit, Bujar Nishani iu kërkoi gjyqtarëve të mbrojnë Republikën. Përmes një konference për shtyp nga Presidenca, Nishani theksoi se gjyqtarët e ndershëm të këtij vendi duhet të ngrihen për të mbrojtur Kushtetutën. Lidhur me protestën e Bashkisë së Tiranës ditën e djeshme përpara Gjykatës Administrative, Nishani i kërkoi Prokurorisë që të nisë hetimet zyrtarisht. Kreu i Shtetit dënoi me ashpërsinë më të madhe sulmin ndaj gjyqtarëve, ndërsa e konsideroi një sulm të organizuar dhe instrumentalizuar politik.

“Sulmi i dhunshëm, qartazi terrorizues ndaj gjyqtarëve në ushtrim të funksioneve kushtetuese, të cilin e dënoj me ashpërsinë më të madhe, jo vetëm për faktin se është një sulm i organizuar dhe instrumentalizuar politik, por i realizuar ndaj një pushteti të pavarur kushtetues, i cili është përcaktuar nga Kushtetuta e Shqipërisë si mekanizmi i vetëm për të garantuar të drejtat themelore. Vlerësoj qëndrimin e ministrit të Drejtësisë dhe besoj që Ministria e Drejtësisë do të vijojë të inkurajojë pavarësinë e gjyqësorit shqiptar; luftën kundër korrupsionit.” u shpreh Presidenti i Republikës.

Kreu i Shtetit i kërkoi Kryeministrit Edi Rama që të dënojë sulmin e dhunshëm ndaj gjyqtarëve të Republikës së Shqipërisë. “I kërkoj Prokurorit të Përgjithshëm, zyrtarisht dhe publikisht të hapë dhe të nisë hetimet për dhunën e ushtruar gjatë ditës së djeshme ndaj gjykatës dhe ndaj gjyqtarëve në ushtrim të detyrës dhe për shkak të detyrës.” vijoi më tej Nishani.

“I kërkoj të gjithë gjyqtarëve të ndershëm që të marrin kurajën dhe të mbrojnë Republikën, është përgjegjësi themelore e institucioneve të pavarura të vendit në një demokraci që funksionon.

I kërkoj qytetarëve të vendit të ruajnë shpresën për të vrarë frikën. Jam i bindur se shoqëria shqiptare përmes sakrificave të mëdha deri në ditën që ne kemi këtë sistem politik dhe kushtetues, do të munden ta ruajnë atë, me gjakftohtësi dhe integritet, gjithë së bashku me aktorët përparimtar të Shqipërisë të vijojmë rrugën e përparimit.” përfundoi Presidenti.